Տուրեր Եգիպտոս . Հանգիստ Եգիպտոսում . Հյուրանոցներ . Վիզա . EGYPTOS

Էջի կարճ նկարագրությունը տրանսլիտով
Hangist Egiptosum kazmakerpelis hangstic dzer tpavorutyunnery klinen amboghjakan ete masnakceq tarabnuyt tureri: Eqskursianer Egiptosum karox eq patvirel inchpes tekhum, aynpes el mer turistakan gorcakalutyan grasenyakum – tur patet depi Egiptos patvirelis: Hangist Sharm el Sheikh yev Hurgada amragrelis ogtveq mer ekskursianeri zexchayin arajarkneric:

Եգիպտոսի Նորություններ

18.09.17 Եգիպտոսում առաջին անգամ հայտնաբերել է փարավոնների դարաշրջանից պահպանված հուղարկավորության պարտեզ

Եգիպտոսում առաջին անգամ հայտնաբերել են փարավոնների դարաշրջանից պահպանված հուղարկավորության պարտեզ

Լուքսորում առաջին անգամ հայտաբերվել է փարավոնների դարաշրջանի հուղարկավորության պարտեզ, որը հսկայական խորհրդանշական նշանակություն ուներ Հին Եգիպտոսում։

Հնությունների բաժնի ղեկավար Մահմուդ Աֆիֆիի խոսքով՝ այդ հազվագյուտ հայտնագործությունն արվել է Նեղոսի արևմտյան ափին հնագիտական պեղումների ժամանակ։ Այդ պարտեզն իրենից ներկայացնում է փոքր քառակուսի տարածքներ, որտեղ մոտ չորս հազար տարի առաջ տնկված են եղել որոշակի տեսակի ծառեր, թփեր ու ծաղիկներ։
Նման պարտեզների գոյության մասին առ այսօր դատում էին միայն քանդակների ու որմնանկարների պատկերներից, բայց որևէ փաստացի ապացույց չէր հայտնաբերվել։

Դամբարանի մոտ հայտնաբերվել է փոքր խուց, որն, ըստ երևույթին, աղոթարանի դեր էր կատարում։ Այնտեղ երեք գերեզմանաքար են հայտնաբերել, որոնց վրա հրաշալի պահպանված գունավոր որմնանկարներ կան։ Գրություններից դատելով՝ դրանք պատկանել են 13-րդ դինաստիային։

Նյութի աղբյուրը՝ news.am

10.09.17 Եգիպտոսում կտուգանվեն հուշանվերներ վաճառող առևտրականները, որոնք անհանգստացնում են զբոսաշրջիկներին

Եգիպտոսում կտուգանվեն հուշանվերներ վաճառող «համառ» առևտրականները, որոնք անհանգստացնում են զբոսաշրջիկներին: Երկրի հնությունների հուշարձանների և մշակութային ժառանգության հարցերով նախարար Խալեդ Ալ Անանիի խոսքով` Եգիպտոսի կառավարությունը հաստատել է օրենսդրության համապատասխան լրացումը: Ալ Անանին նշել է, որ հնագիտական պեղումների տարածքներում զբոսաշրջիկներին հետապնդելու համար առևտրականներին կարող են տուգանել երեքից տաս հազար եգիպտական ֆունտով:

Դրանից բացի նախարարն ասել է, որ կխստացվի ապօրինի հնագիտական պեղումների, հնության հուշարձանների գողության և վաճառքի համար պատիժը: Օրինազանցին սպառնում է ազատազրկում՝ ընդհուպ ցմահ:

Նյութի աղբյուրը՝ tert.am

02.09.17 Եգիպտոսը 360 մլն դոլար կհատկացնի օդանավակայանների անվտանգության համակարգերի արդիականացմանը

Կահիրեն 360 մլն դոլար կհատկացնի երկրի օդանավակայանների անվտանգության և աէրոնավիգացիայի համակարգերի արդիականացման համար: Այդ մասին օգոստոսի 24-ին հայտնել է Եգիպտոսի քաղաքացիական ավիացիայի նախարար Շերիֆ Ֆաթհին՝ ելույթ ունենալով Մերձավոր Արեւելքի և Աֆրիկայի ավիաանվտանգությանը նվիրված տարածաշրջանային խորհրդաժողովի նախարարական հանդիպմանը, որն անցկացվում էր Շարմ Էլ Շեյխում:

«Արդեն 60 մլն դոլար է ծախսվել այն օդանավակայանների անվտանգության համակարգերի զարգացման վրա, որոնք համապատասխանում են ամենաբարձր միջազգային չափանիշներին,- ասել է նա: -Եվս 300 միլիոնը կօգտագործվի աէրոնավիգացիոն համակարգերի արդիականացման համար, որն, ըստ պլանի, պետք է ավարտվի 2019 թվականին»:
Նախարարի խոսքով՝ «ահաբեկչությունն ամենամեծ սպառնալիքն է, որին ներկայում բախվում է քաղաքացիական ավիացիան, ուստի անվտանգության ապահովումը տրանսպորտի բնագավառում գերակա ուղղություն է մնում պետությունների համար»:

26.08.17 Եգիպտոսի մայրաքաղաքը կփոխվի

Newsru.co.il-ը հայտնում է, որ Եգիպտոսի նախագահ Աբդել Ֆաթահ աս Սիսին խորհրդակցություն է անցկացրել գերատեսչությունների ղեկավարների հետ. գլխավոր թեման եղել է երկրի մայրաքաղաքը Կահիրեից նոր քաղաք տեղափոխելու հարցը: Նոր քաղաքում կտեղակայվեն պետական հաստատությունները:
Տների բնակեցման գործընթացը կմեկնարկի մոտ օրերս:

Նյութի աղբյուրը՝ www.hayeli.am/article/1030709

Նորությունների բաժինը 3 ամսով արձակուրդում կլինի

Արձակուրդում է նորությունների բաժինը, սակայն Եգիպտ Տուր տուրիստական ընկերությունը կաշխատի անփոփոխ գրաֆիկով:

17.05.17 Եգիպտացի հնագետների բացահայտումը հաստատել է Թութանհամոնի մահվան նոր տարբերակը

Էլ Մինե նահանգում պեղումներ իրականացնող եգիպտացի հնագետները յուրօրինակ արտեֆակտ են հայտնաբերել, որը խոսում է հօգուտ Հին եգիպտական փարավոն Թութանհամոնի մահվան նոր տարբերակի:

«Էլ Մինեի գտածոյով գիտնականները փաստացի ապացույց ունեցան Թութանհամոնի վախճանի այն տարբերակի մասին, որը մինչ օրս կասկածելի էր համարվում», - հայտարարել է նահանգի հնությունների բաժնի վարչության ներկայացուցիչ Աբդալլահ էլ-Հեմսը: Նա ասել է, որ հայտնաբերվել է Թութանհամոնի մերձավոր խորհրդական, անվտանգության ու արքայական ընտանիքի ներքին կարգուկանոնի համար պատասխանատու անձի հուղարկավորման վայրը:
Նրա բազալտե սարկոֆագի մոտ գիտնականները լիբանանյան մայրուց պատրաստված արկղ են նկատել, որտեղ առանձին «սարք» է եղել` շատ նման ժամանակակից երկանվանի հեծանվին: Սարկոֆագի վրա գրություններից մեկը վկայում է, որ այն մշակվել էր «տեղափոխությունն արագացնելու համար, ինչպես նաեւ հենց իր` պայծառափայլ փարավոնի եւ նրա կնոջ ու երեխաների ժամանցի ու վայելքի համար»:

Այժմ գրեթե հարյուր տոկոս վստահությամբ կարելի է ասել, որ Թութանհամոնը մահացել է արյան վարակումից` ոտքը կոտրելու հետեւանքով: Պատճառը հին հեծանվից ընկնելն էր:

09.05.17 Եգիպտոսում հնագետները հայտնաբերել են 6 հազար տարվա ժայռապատկերներ

Եգիպտագետները Ասուանա քաղաքից ոչ հեռու հայտնաբերել են ժայռապատկերներ՝ արված մ.թ.ա. 4000 տարի առաջ: Այդ մասին տեղեկատվությունը հրապարակվել է Բոննի համալսարանի կայքում:

Նկարները փորագրված են ժայռերի վրա և պատկերում են որսի տեսարաններ: Հավանաբար դրանք հանդիսանում են նեոլիթյան և Հին Եգիպտոսի մշակույթի կապող օղակ:

29.04.17 Եգիպտոսը հունիսից կգործարկի էլեկտրոնային վիզաների տրամադրման համակարգը

Եգիպտոսի զբոսաշրջության հարցերով նախարար Յախյա Ռաշիդը Դուբայում կայացած զբոսաշրջային համաժողովի շրջանակում հայտարարել է, որ Կահիրեն հունիսի սկզբից պաշտոնապես կգործարկի զբոսաշրջիկների համար էլեկտրոնային այցագրերի տրամադրման համակարգը:

Նոր համակարգի շրջանակում զբոսաշրջիկները կկարողանան այցագիր ստանալու դիմում ներկայացնել, վճարում անել ու այն ստանալ՝ գտնվելով մոլորակի ցանկացած կետում:

20.04.17 Իտալացի գիտնականները Նեֆերտիտիի դամբարանի որոնումներ են նախաձեռնել

Թուրինի համալսարանի հնագետները եւ ֆիզիկոսները սկսել են Թութանհամոնի դամբարանի պատերի ուսումնասիրությունը: Նրանք պնդում են, որ այսպես կկարողանան գտնել այն սենյակները, որտեղ գտնվում են Նեֆերտիտիի եւ շատ այլ փարավոնների աճյունները:

Ամեն ինչ սկսվել է անգլիացի պատմաբան եւ հնագետ Նիկոլաս Ռիվզի 2015-ի օգոստոսին հրապարակած հոդվածից: Հոդվածում նշված էր, որ Թութանհամոնի դամբարանի պատերից մեկի հետեւում կարող է լինել Նեֆերտիտիի հանգստավայրը: Ռիվզի տվյալները պատրաստվում էին ստուգել ճապոնացի եւ ամերիկացի գիտնականների խումբը: Նրանք կառույցը ստուգել են հատուկ սարքավորման միջոցով:

Եգիպտոսի հնադարի հուշարձանների նախարարությունը հետազոտության իրավունքը փոխանցել է իտալացի գիտնականներին: Իտալացիների գիտական խումբը նախատեսել է ոչ միայն Թութանհամոնի դամբարանի, այլ նաեւ Թագավորների հովտի ամբողջական հետազոտություն կատարել: Այն կկատարվի հատուկ ռադարային սարքերով, որոնք թույլ կտան տեսնել նույնիսկ 10 մետր խորությամբ կառույցը:

13.04.17 Եգիպտոսում 3700 տարվա հնության բուրգ-դամբարան են հայտնաբերել

Հնագետները Կահիրեից հարավ ընկած շրջանում գտնվող բուրգի տարածքում դամբարանի լավ պահպանված բեկորներ են հայտնաբերել, որը կառուցվել է 3700 տարի առաջ: Հայտնագործության մասին տեղեկացնում է International Business Times-ը` դամբարանը գտնվում է եգիպտական Դահշուր փարավոնների դամբարանադաշտում: Ենթադրվում է, որ այն պատկանում է XIII արքայատոհմի ներկայացուցիչներից մեկին, որը Եգիպտոսում իշխել է մ.թ.ա. 18-17-րդ դարերում:

Բուրգի պահպանված մնացորդներն իրենցից ներկայացնում են երկար ձգվող ներքին միջանցք և 10 տողանի հիերոգլիֆներ պարունակող քարաբեկոր:
Կոպենհանգենի համալսարանի եգիպտագետի խոսքով` դա կարող է լինել Ամենի Կեմաու փարավոնի դամբարանը, որը Եգիպտոսում իշխել է 1775-1750 թթ.:

05.04.17 Գիտնականները հին եգիպտական շինարար Սենմութի դամբարանում հանելուկային առաստաղ են հայտնաբերել

Գիտնականները հանելուկային առաստաղ են հայտնաբերել հին եգիպտական շինարար Սենմութի դամբարանում: Ըստ հետազոտողների՝ դամբարանի կառուցման համար արտերկրային տեխնոլոգիաներ են օգտագործվել:

Ինչպես պատմում է հետազոտող Սքոթ Վարինգը, նախկինում գիտնականները բազմաթիվ նյութեր են գտել, որոնք վկայում են այն մասին, որ հին եգիպտական կառավարիչները եկվորներ են եղել: Նոր Թագավորության XVIII դինաստիայի գործչի դամբարանի առաստաղը դրա եւս մեկ ապացույցն է: Դամբարանի առաստաղը երկնակամար է հիշեցնում՝ աստղակերպի նշաններով եւ այլ համաստեղություններով:

Գիտնականները պարզել են, որ Սենմութը Հաթշեպսուտ թագուհու ճարտարապետն է եղել եւ ղեկավարել է Կարնակե տաճարի շինարարությունը, որը հայտնի է աշխարհում ամենաբարձր կոթողով: Սոքթ Վարինգի խոսքով՝ ճարտարապետի դամբարանի առաստաղի վրա մասնագետների համար անհասկանալի անճշտություն կա. կենտրոնում պատկերված է Օրիոն-Սիրիուս խումբը, որտեղ Օրիոնը Սիրուսի արեւմտյան մասում է, մինչդեռ պետք է լինի արեւելքում:

27.03.17 Եգիպտոսում հսկայական կոկորդիլոսի մումիա են պեղել

Հնէաբանները Եգիպտոսի Քենա շրջանի հյուսիսում 4 մետրանոց կոկորդիլոսի մումիա են հայտնաբերել, որը կերպավորում է հին եգիպտական ջրի աստված Սեբեքին:

Բացահայտումը կատարվել է Նեղոսի արևելյան ափին գտնվող Նագ-Համադի մարզի պեղումների ժամանակ: Այստեղ են գտնվել հեղինակություն ունեցողների և փարավոնին մոտ գտնված մարդկանց գերեզմանները, ինչպես նաև մի քանի տաճար՝ Հին Եգիպտոսի գլխավոր աստվածությունների պատվին:
Աշխատանքների ընթացքում հնէաբանները հայտնաբերել են ևս մի քանի մումիֆիկացված կոկորդիլոս, որոնցից երկուսի երկարությունը անցնում է 1,2 մետրից, ինչպես նաև մի քանի ավելի փոքրահասակ կենդանիների գլուխներ, որոնց եգիպտացիները նույնպես սուրբ են համարել:
Բացի այդ, գտնվել են հատուկ գործիքներ, որոնք օգտագործվել են հատուկ նյութերով մարմինը պահպանելու ընթացքում և կտորի փաթաթաններ, որոնցով փաթաթում էին մումիաներին՝ նախքան թաղումը:

18.03.17 Եգիպտոսը չի բարձրացնի զբոսաշրջային մուտքի արտոնագրի գինը

Եգիպտոսի զբոսաշրջության նախարար Յահյա Ռաշեդը հայտարարել է, որ երկրի կառավարությունը չեղարկել է մուտքի արտոնագրերի գինը երկուսուկես անգամ բարձրացնելու իր որոշումը։
«Այժմ չափազանց անհարմար ժամանակ է մուտքի արտոնագրերի գները բարձրացնելու համար, չնայած որ դա այս պահին երկրին անհրաժեշտ էր, սակայն այդ միջոցը ավելի մեծ ճգնաժամի առաջ կկանգնեցնի այս ոլորտին»,– ասել է Ռաշեդը։

11.03.17 Կահիրեում փոսի միջից հայտնաբերել են Ռամզես II-ի արձանի մասեր (տեսանյութ)

Կահիրեում հնագետները գրունտային ջրերով լցված փոսի միջից հայտնաբերել են Ռամզես II-ի արձանի մասեր։ Այս մասին գրում է mignews.com-ը:

Ռամզես II-ը Հին Եգիպտոսը կառավարել է մ. թ. ա. 1279-1213 թթ.:

01.03.17 Եգիպտոսը մոտ 2.5 անգամ թանկացնում է վիզան

Եգիպտոսի արտաքին գործերի նախարարությունը պաշտոնապես հայտարարել է 2017 թվականի հուլիսի 1-ից վիզայի արժեքը 25 դոլարից 60 դոլար դարձնելու մասին:

Այս մասին գրում է Ինտերֆաքսը՝ հղում անելով Եգիպտոսի արտաքին գործերի նախարարությանը:

23.02.17 Եգիպտոսի իշխանությունները որոշել են էլեկտրոնային մուտքի վիզաներ ներդնել

Եգիպտոսի իշխանությունները մտադիր են վերանայել զբոսաշրջության ոլորտում ներգրավված բոլոր կառույցների օրենսդրական բազան՝ այն համապատասխանեցնելով միջազգային զբոսաշրջային ստանդարտներին:

Երկրի նախագահ Աբդել Ֆաթթահ աս-Սիսիի մասնակցությամբ անցկացված խորհրդակցությանը քննարկվել է, մասնավորապես, «Եգիպտոս մուտքի էլեկտրոնային վիզաների ներդրման մեխանիզմների հարցը», նաև առաջարկվել է ուսումնասիրել բաց երկնքի քաղաքականությանը Եգիպտոսի միանալու հնարավորությունը՝ նպատակ ունենալով «խթանել երկիր մասնավոր ավիաընկերությունների թռիչքները»:

Առաջարկվել է հատուկ ուշադրություն դարձնել կրոնական և բժշկական տուրիզմի տարածմանը:

Նյութի աղբյուրը՝ news.am

17.02.17 Գիտնականները հայտնաբերել են Նեֆերտիտի թագուհու մումիֆիկացված ոտքերը

Հնագետների միջազգային խումբը հայտնաբերել է Եգիպտոսի Ռամզես II փարավոնի սիրելի կնոջ` Նեֆերտիտի թագուհու մումիֆիկացված ոտքերը:
Թուրինի Եգիպտական թանգարանում ցուցադրվող մումիֆիկացված ոտքերը հենց Եգիպտոսի նոր թագավորության 19-րդ արքայատոհմի թագուհուն են պատկանել, ով բնակվել է մ.թ.ա. 13-րդ դարում: Դա են ապացուցում գիտնականների միջազգային թիմի, այդ թվում` Յորքի համալսարանի հնագետների կատարած լայնածավալ ուսումնասիրությունները:

Արքունիքում սիրելի կնոջ կարգավիճակի շնորհիվ Նեֆերտիտի թագուհին հուղարկավորվել է զարդանախշ շքեղ դամբարանում, սակայն նրա հանգստավայրը կողոպուտի է ենթարկվել դամբարաններ թալանողների կողմից դեռևս հնագույն ժամանակներում: Բարեբախտաբար, որոշ իրեր մնացել էին իրենց տեղում, որոնք 1904 թվականին առաջին անգամ պեղումների ժամանակ հայտնաբերել է իտալացի հնեաբան Էռնեստո Սկիապարելլին: Պեղումների ժամանակ հայտնաբերված իրերի թվում են եղել մումիֆիկացված ոտքերը: Դրանք ուղարկվել են Թուրինի Եգիպտական թանգարան, որտեղ որոշվել է, որ դրանք պատկանել են Նեֆերտիտի թագուհուն, սակայն մինչ այսօր գիտական հետազոտություններ չէին արվել: Միայն վերջերս կատարված խորազնին ուսումնասիրությունը թույլ է տվել ենթադրել, որ դրանք կարող էին պատկանել եգիպտական հայտնի թագուհուն:

Նյութի աղբյուրը՝ tert.am

10.02.17 Կես տոննա կշռող եգիպտուհին 25 տարվա ընթացքում առաջին անգամ տնից դուրս է եկել

500 կիլոգրամ կշռող եգիպտուհի Իման Ահմադ Աբուլատիին տեղափոխել են Մումբաի: 25 տարվա ընթացքում առաջին անգամ կինը դուրս է եկել տնից` ճարպակալման դեմ բուժվելու համար:
Եգիպտական թերթերը Աբուլատիին կոչում են աշխարհում ամենածանր կինը:

Կնոջը 10 օր նախապատրաստել են թռիչքին: Նրան հատուկ պատրաստուկներ են ներարկել, որպեսզի Egypt Air բեռնատար օդանավով թռիչքը բարեհաջող անցնի: Նրան հիվանդանոց են տեղափոխել ոստիկանների ուղեկցող պահակախմբով, իսկ հիվանդասենյակ են բարձրացրել ամբարձիչ սարքով: Այժմ Աբուլատիին հետազոտում են, իսկ բուժումն ու վիրահատությունը բժիշկները նախատեսում են մոտ մեկ ամսից: Հիվանդանոցը ստանձնել է բժշկական ծախսերի վճարումը:

36-ամյա Իմանը ցանկանում է նորից ինքնուրույն քայլել և բնականոն կյանք սկսել:

Նյութի աղբյուրը՝ araratnews.am

02.02.17 Եգիպտական կրկեսում առյուծը հանդիսատեսի աչքի առաջ հոշոտել է իրեն վարժեցնողին (տեսանյութ)

25.01.17 Հնագետները ենթադրում են, որ Եգիպտոսում նոր դամբարաններ են գտել

Եգիպտոսի Կուբեթ էլ-Խավա դամբարանադաշտի տարածքում հին պատ է հայտնաբերվել: Հնագիտական գտածոյի մասին հայտնել է International Buisiness Times պորտալը: Ասուանի և Նուբիի հնագիտական շրջանների հնությունների բաժնի տնօրեն Նասր Սալամը գտածոն "ցնցող" է համարել:

Դամբարանադաշտում աշխատող հնագետները հին պատ են հայտնաբերել, որի վերին մասում հետիոտնային ճանապարհ է եղել: Գիտնականների ենթադրությամբ՝ պատը պահպանում է դամբարանները, որոնք ավելի խորն են տեղակայված: Մասնագետների գնահատմամբ՝ պատը կառուցվել է մ.թ.ա. 2278–2184 թվականներին:

Կուբեթ էլ-Խավա դամբարանադաշտը հնագետների համար չափազանց նշանակալից է, քանի որ այս տարածքում են գտնվում Հին (մ.թ.ա. 2700–2180 թվականներ) և Միջին (մ.թ.ա. 2040–1783 թվականներ) թագավորությունների ժամանակների պաշտոնյաների ժայռափոր դամբարանները:

Նյութի աղբյուրը՝ news.am

17.01.17 2017թ.-ի ավարտին Եգիպտոսն ընդունելու է 12 մլն զբոսաշրջիկ

Չնայած միջազգային հոսքի 40%-ով անկմանը՝ Եգիպտոսի իշխանությունները և զբոսաշրջային կազմակերպությունները նպատակադրված են վերադարձնել նախկին ցուցանիշները և 2017թ.-ին ապահովել գոնե 12 մլն զբոսաշրջիկներ:
Այս մասին հաղորդում է եգիպտական Ahram Online հրատարակությունը հղում անելով Եգիպտոսի Զբոսաշրջության նախարար Yehia Rashed-ին, ով լրագրողներին ներկայացրել է կորցված տուրհոսքը հետ բերելու պլանները:
Նրա խոսքերով` 2014թ.-ի համեմատությամբ 2015թ.-ի հունվարին Եգիպտոսը կորցրել է զբոսաշրջությունից ստացված հասույթի 46%-ը, առաջին կիսամյակի արդյունքում` 40%:

Յուրաքանչյուր ամիս երկիրը կորցնում է ավելի քան 2.2 մլրդ եգիպտական ֆունթ:

09.01.17 Կահիրեի օդանավակայանում գործարկվել է կենսաչափական հսկողության համակարգը

Կահիրեի միջազգային օդանավակայանում արդեն գործում է աշխատակիցների կենսաչափական հասանելիության համակարգը:

«Միջազգային օդանավակայանում արդեն գործում է աշխատակիցների կենսաչափական հասանելիության համակարգը, որն աշխատակցի անձը նույնականացնում է մատնահետքերով եւ աչքերի ցանցաթաղանթով»,- հայտնել է նա:
Գործակալության զրուցակիցը հավելել է, որ համակարգն առայժմ բոլոր աշխատակիցներին չի ընդգրկում: «Որոշ տեխնիկական մասնագետներ դեռեւս համակարգի մեջ չեն ներառվել: Աշխատանք է տարվում բոլոր աշխատակիցներին ներգրավելու ուղղությամբ»,- պարզաբանել է նա՝ չկարողանալով հայտնել, թե երբ է նախատեսված համակարգի ամբողջական ծավալով աշխատանքի մեկնարկը:

Նյութի աղբյուրը՝ news.am

24.12.16 Եգիպտոսում հայկական համայնքի մասին ֆիլմ են նկարահանել

Ռեժիսոր Վահեդ Սոբխին «Մենք, Եգիպտոսի հայերս» անվանումով վավերագրական ֆիլմ է նկարահանել Եգիպտոսի հայկական համայնքի մասին։
Ֆիլմում համայնքի երկարատև պատմությունը ներկայացված է նրա ներկայացուցիչների մասին պատմությունների միջոցով, հայտնում է Ahram Online–ը։
Ֆիլմը նկարահանվել է Էվա Դադրիյանի սցենարով ու ցուցադրվել է Կահիրեի Միջազգային կինոփառատոնում։

Ռեժիսորի խոսքով նկարահանումների ընթացքում ինքը շատ փաստեր է իմացել Եգիպտոսի հայերի, Եգիպտոսի պատմության ու հասարակության մեջ նրանց մեծ ավանդի մասին։ Նա նաև նշել է, որ աշխատանքների ընթացքում սցենարի հեղինակը կապվել է գիտնականների հետ Վաշինգթոնում, Լոնդոնում ու Երևանում։

Նյութի աղբյուրը՝ news.am

17.12.16 Հին Եգիպտոսում նախ գրել են կավե սալիկների, այնուհետև՝ պապիրուսի վրա

Գրքի սկզբնավորումը կապված է գրի ստեղծման հետ, որը մի քանի հազար տարվա պատմություն ունի։
Անցյալում բաբելացիները, ասորեստանցիները և այլ հին ժողովուրդներ գրել են հիմնականում կավե սալիկների վրա։

Պահպանվել է մ. թ. ա. III հազարամյակում սալիկների վրա գրված գեղարվեստական հնագույն՝ ասուրա-բաբելական «Գիլգամեշ» դյուցազներգությունը։ Այդ եղանակով կազմված գրքերից են ստեղծվել առաջին գրադարանները։

Չինաստանում գրել են հնդկեղեգից (բամբուկ) պատրաստված շերտիկների վրա և շարել ամուր թելի վրա։ Ավելի ուշ չինացիները գրել են մետաքսի, իսկ մ. թ. II դարից՝ թղթի վրա։ Հին Եգիպտոսում նախ գրել են կավե սալիկների, այնուհետև՝ պապիրուսի վրա, որը եղեգի մամլած շերտիկներն իրար սոսնձած մի քանի տասնյակ մետր երկարությամբ ժապավեն էր և պահվում էր գլանաձև փաթաթված։ Մ. թ. ա. II դարում Պերգամոն քաղաքում կենդանիների կաշվից պատրաստվել է նոր գրանյութ և քաղաքի անունով կոչվել պերգամենտ։ Այն մեզ հայտնի մագաղաթն է։

Նյութի աղբյուրը՝ shamshyan.com

09.12.16 Եգիպտոսում հայտնաբերվել է հազարամյա մումիա

Իսպանիայի հնագետները Եգիպտոսի հարավային Լուքսոր քաղաքի մոտ հայտնաբերել են հազարամյակների պատմություն ունեցող «շատ լավ պահպանված» մումիա: Այս մասին հայտնում է անտիկ իրերի նախարարությունը:

Հայտնաբերված մումիան եղել է դագաղում, որը թվագրվում է մ.թ.ա. 1075-664թթ.: Մումիան եղել է փայտե գունազարդ սարկոֆագի մեջ և թաղված է եղել Թութանհամոն III-ի դամբարանի մոտ:

Ենթադրվում է, որ գերեզմանը պատկանել է թագավորական ընտանիքի ծառայի:

Նյութի աղբյուրը՝ ankakh.com

30.11.16 Եգիպտոսի խորհրդարանը պատրաստվում է Հայոց ցեղասպանությունը դատապարտող բանաձևը ներառել օրակարգ

Եգիպտոսի խորհրդարանը պատրաստվում է 1915 թվականին հայերի նկատմամբ Թուրքիայի իրագործած կոտորածը դատապարտող բանաձևը ներառել օրակարգ: Ինչպես «Արմենպրես»-ին տեղեկացրեց Եգիպտոսում Հայ Դատի հանձնախմբի ղեկավար Արմեն Մազլումյանը, այս մասին օրերս Եգիպտոսում գտնվող եվրոպացի պատվիրակության հետ հանդիպմանը նշել է եգիպտացի պատգամավոր Մուսթաֆա Պաքրին:

«Մուսթաֆա Պաքրին պատվիրակության անդամներին ներկայացրել է Հայոց ցեղասպանության վերաբերյալ Եգիպտոսի խորհրդարանի կեցվածքը` հաստատելով, որ Թուրքիայի իրագործած հայոց կոտորածը դատապարտող բանաձևը պատրաստվում են ներկայացնել քվեարկության: Նա հաստատել է, որ դա «ամոթի խարան» է Թուրքիայի ճակատին և բոլոր կառավարությունները ևս պետք է դատապարտեն այդ անմարդկային կոտորածը»,-ասաց Արմեն Մազլումյանը:

Պաքրին նշել է, որ եգիպտական խորհրդարանի անդամները ստորագրահավաք են կազմակերպել և 337 պատգամավոր հավանություն է տվել Ցեղասպանության ճանաչման և դատապարտման նախաձեռնությանը` վստահություն հայտնելով, որ քվեարկությունը կկատարվի բանաձևի օգտին:
Եգիպտացի պատգամավորը միաժամանակ դատապարտել է արաբական պետությունների կեցվածքը Հայոց ցեղասպանության առնչությամբ, նշելով, որ մինչ այժմ միայն Լիբանանն է ճանաչել:

Եվրոպական պատվիրակությունը մի շարք հանդիպումների հետ մեկտեղ հանդիպել է նաև հայ համայնքի ներկայացուցիչների հետ: Պատվիրակությանը ներկայացվել է, որ հայերը Եգիպտոսում ապրում են խաղաղության մեջ, օգտվում են բոլոր իրավունքներից:

Նյութի աղբյուրը՝ hayernaysor.am

21.11.16 Եգիպտոսում «շաքարի ճգնաժամ» է սկսվել

Եգիպտոսում արդեն մի քանի շաբաթ է շաքարի սուր ճգնաժամ է սկսվել։ Խանութների մեծ մասում շաքարը սպառվել է, ու սոցցանցերում պարբերաբար հրապարակում են դատարկ վաճառասեղանների ու երկար հերթերի լուսանկարներ, հայտնում է Kedem–ը։
Իսկ այն խանութներում, որտեղ դեռ շաքար մնացել է, դրա գինը գրեթե կրկնապատկվել է, ընդ որում միաժամանակ նույն մարդուն ընդամենը 2 կգ շաքար է վաճառվում։ Այս կապակցությամբ Եգիպտոսում աճում է բնակչության դժգոհությունը, միաժամանակ սպեկուլյանտները փորձում են օգուտ քաղել այս իրավիճակից։

Փորձագետները համարում են, որ շաքարային ճգնաժամը ներքին ու արտաքին գործոնների ազդեցության հետեւանք է։
Նախեւառաջ, ճգնաժամը կապակցված է նրա հետ, որ Եգիպտոսն ավելի շատ շաքար է ծախսում, քան` արտադրում։ Երկիրը սպառում է տարեկան 3 մլն տոննա շաքար, մինչդեռ արտադրում է այդ ծավալի ընդամենը երկու երրորդը։

Նյութի աղբյուրը՝ top-news.am

Կայքում տարվում են տեխնիկական աշխատանքներ

2 ամսով նորությունների հրապարակումը դադարեցվում է:

26.09.16 Հղիությունը ստուգելու հին եգիպտական թեստ

Բոլոր ժամանակներում էլ ամուսնական զույգերը շտապել են իմանալ՝ երբ են ծնող դառնալու, կինը վայրկյան առաջ ուզել է պարզել՝ հղի՞ է, թե՞ ոչ: Բայց միայն վերջին տասնամյակներում դեղատներում հայտնվեցին թղթե ձողիկներ, որոնք կնոջ մեզի մեջ մտցնելով հնարավոր է պարզել՝ կինը հղի՞ է, թե՞ ոչ:

Պարզվում է, որ հղիությունը վաղաժամ պարզել փորձել են անգամ հին եգիպտացիները: Այս մասին առաջին վկայությունները հնագետները գտել են Կալսբերգի թողած պապիրուսում, որը գրվել է մ.թ.ա. 21-րդ դարում:
Պապիրուսում խոսվում է տարբեր հիվանդությունների հետազոտության և բուժման եղանակների մասին: Այնտեղ մանրամասն նկարագրվում է նաև կնոջ հղիությունն ու պտղի սեռը որոշելու մեթոդները: Այսպես` վերցրել են 2 պարկ, մեկի մեջ լցրել գարի, մյուսի մեջ՝ ցորեն: 2 պարկն էլ ամեն օր «ջրել են» այն կնոջ մեզով, ում մոտ հղիության կասկած կա: Եթե ցորենն ու գարին ծիլ տային, նշանակում էր` կինը հղի է: Գարու ծլարձակումը խոսում էր այն մասին, որ այս ընտանիքում արու զավակ լույս աշխարհ կգա, ցորենի ծլարձակման դեպքում՝ պետք էր սպասել դստեր ծնունդի: Եթե հացահատիկները չծլեին, ուրեմն կնոջ մոտ հղիություն չկա:

1934 թ-ին գերմանացի բուսաբան Վալտեր Գոֆմանը հղիության հնագույն ճշտման մի փորձարկում իրականացրեց: Նա հողով լի 6 տարա վերցրեց, դրանցից 3-ում գարի ցանեց, 3-ում` ցորեն: Տարաներից 2-ն անընդհատ ջրեց հղի կնոջ մեզով, մյուս 2-ը՝ ոչ հղի կնոջ մեզով, վերջին 2-ում պարբերաբար լցրեց սովորական ջուր: Ժամանակ առ ժամանակ սովորական ջուր լցնում էր բոլոր 6 տարաների մեջ: Սովորական ջրով ջրվող տարաներում ցանած հացահատիկը ծիլ տվեց 6-7 օր անց: Ոչ հղի կնոջ մեզով ջրվող բույսերն սկսեցին աճել 10-14 օր անց, բայց սածիլներն հիվանդ էին և մի ամիս հետո չորացան: Հղի կնոջ մեզով ջրված սերմերը շատ արագ ծիլ տվեցին: Դրանց ձողունները շատ առողջ էին և արագ վերընձյուղվում էին:

Նյութի աղբյուրը՝ newmag.am

18.09.16 Գիզայի մեծ բուրգի կառուցման ընթացքում յուրաքանչյուր աշխատող ստանում էր 4-5 լիտր գարեջուր օրը

Գարեջուրը աշխարհի ամենահին պատրաստվող ալկոհոլներից մեկն է։ Գրավոր հիշատակություններ պահպանվել են անտիկ Իրաքում և անտիկ Եգիպտոսում։ Հնագետները ենթադրում են, որ գարեջուրը նպաստել է քաղաքակրթությունների ձևավորմանը։

Մոտավորապես 5000 տարի առաջ Ուրուկ (ներկայիս Իրաքում) քաղաքի աշխատողները վարձատրվում էին գարեջրով։ Գիզայի մեծ բուրգի կառուցման ժամանակ յուրաքանչյուր աշխատող օրական սննդակարգում ստանում էր չորսից հինգ լիտր գարեջուր, որը ծառայում էր և՜ որպես սնունդ, և՜ որպես զովացուցիչ ըմպելիք, ինչը շատ տեղին էր բուրգի շինարարության ժամանակ։

07.09.16 Եգիպտոսում ավելորդ քաշի պատճառով մի քանի հաղորդավարուհիների հեռացրել են աշխատանքից

Եգիպտոսի պետական հեռուստատեսությունում 8 հաղորդավարուհիներ հեռացվել են աշխատանքից ավելորդ քաշի պատճառով, գրում է BBC-ն:
Ընկերությունը կանանց մեկ ամիս ժամանակ է տվել` նիհարելու և կրկին եթերում հայտնվելու հնարավորություն ստանալու համար:

Հաղորդավարուհիներից մեկը վստահ է, որ ինքը իսկապես չափազանց շատ ավելորդ քաշ ունի, թե ոչ, պետք է որոշեն հեռուստադիտողները, այլ ոչ թե ալիքի ղեկավարությունը:

Տեղի կանանց իրավապաշտպան կազմակերպությունը քննադատել է նման որոշումը, քանի որ այն հակասում է սահմանադրությանը և «կանանց հանդեպ բռնություն» է ներկայացնում:

Նյութի աղբյուրը՝ shabat.am

Նորությունների բաժինը 1,5 ամսով արձակուրդում կլինի

24.07.16 Հայտնաբերվել է ամենաուղղանկյուն երկիրը

Ավստրալիացի Դեվիդ Բերրին համեմատել է աշխարհի բոլոր երկրների տարածքները ու պարզել, որ ամենաուղղանկյուն երկիրը Եգիպտոսն է: Այս մասին նա պատմել է իր բլոգում:
Վիճակագրության մասնագետը հատուկ բանաձևի միջոցով է գտել կատարյալ ուղղանկյունուն ձևով ամենամոտ երկրները: Նա ուղղանկյունությունը համեմատել է երկրի ուրվագծերի առավելագույն համադրությունը էկվիդիստանտային պրոյեկցիայով հաշվարկված զուգահեռագծի հետ:

Առաջին եռյակը բավականին անսպասելի էր՝ Եգիպտոս, Վատիկան ու Սինթ Մարտեն (կղզի պետություն): Ուշագրավ է, որ առաջին քսանյակում են ոչ միայն այն երկրները, որոնց տարածքում անապատներ կան և նախկին գաղութ-պետություննները, քանի որ դրանց սահմանները բառացիորեն «քանոնով են գծված», այլև՝ Մակեդոնիան, Լեհաստանը, Թուրքիան:

Նյութի աղբյուրը՝ news.am

16.07.16 Հին եգիպտական պապիրուսներում Քեոփսի բուրգը կառուցած բանվորների մասին տեղեկություններ են գտել

Կահիրեի եգիպտական թանգարանի նմուշների մեջ հայտնվել են պապիրուսներ, որոնք պատմում են Գիզայում Մեծ բուրգը կառուցած բանվորների կյանքի մասին։ Եգիպտոսի հնագիտությունների հարցերով նախարար Խալեդ Էլ Աննիի խոսքով՝ 2013-ին հայտնաբերած նմուշները Եգիպտոսում երբևէ գտած ամենահին գտածոներն են։
Ենթադրաբար, պապիրուսները պատրաստվել են 4.5 հազար տարի առաջ՝ Եգիպտոսի Հնագույն թագավորության 4-րդ դինաստիայի երկրորդ փարավոն Քեոփսի օրոք, որի հրամանով կառուցվել է եգիպտական խոշորագույն բուրգը։
Պապիրուսները նկարագրում են բուրգը կառուցող բանվորների առօրյան, որոնք Կարմիր ծովից շինանյութ էին բերում Գիզա։

Այս պահին թանգարանում ցուցադրված են հայտնաբերված բոլոր 30 պապիրուսները։

Քեոփսի բուրգը կառուցվել է մ.թ.ա 3-րդ հազարամյակի կեսերին։

Նյութի աղբյուրը՝ news.am

30.06.16 Քեոփսի բուրգի հիմքի կողմերը անհավասար են

Ինժեներ Գլեն Դաշի ու եգիպտագետ Մարկ Լելերի ղեկավարությամբ գիտնականներին առաջին անգամ հաջողվել է չափել Քեոփսի բուրգի հիմքի կողմերի միջև տարբերությունը:
Պարզվել է, որ հիմքը լրիվ քառակուսի չէ: Կողմերի երկարության միջև տարբերությունը մասամբ պայմանավորված է որոշ կավե սալիկների բացակայությամբ, որոնցով շինարարության ժամանակ երեսպատվել է բուրգը: Գտնելով հանված երեսպատման սալիկների հետքերը՝ գիտնականները հաշվել են, որ բուրգի արևելյան հիմքի երկարությունը շինարարության ժամանակ կազմում էր 230.30-230.37 մետր, իսկ արևմտյան կողմինը՝ 755.83-756.02 մետր, այսինքն, արևմտյան կողմը միջինը 14 սանտիմետրով երկար էր արևելյանից:

Բայցևայնպես գիտնականները նշում են այն ճշգրտությունը, որով դրվել է բուրգի հիմքը ավելի քան 4500 տարի առաջ: "Տվյալները ցույց են տալիս, որ եգիպտացիները իրենց ժամանակի համար փայլուն փորձ ունեին",- եզրահանգել են հետազոտողները:

Նյութի աղբյուրը՝ համացանցի լրահոսից:

19.06.16 Ապացուցվել է Թութանհամոնի դաշույնի ոչ երկրային ծագումը

Իտալացի ու եգիպտացի հնագետները ապացուցել են Թութանհամոնի դաշույնի ոչ երկրային ծագումը:
Խոսքն այն երկու դաշույններից մեկի մասին է, որոնք 1925 թ. հայտնաբերել էր բրիտանացի Հովարդ Քարթերը փարավոնի դամբարանի պեղումների ժամանակ:

Հնագետները ենթադրում են, որ դաշույնը պատրաստված է երկնաքարային նյութից: Գիտնականները դաշույնի բաղադրությունը ռենտգենաֆլուորեսցենտային հետազոտության են ենթարկել: Դաշույնի սայրը, որը գերազանցաբար երկաթից է, ունի նիկելի ու կոբալտի անբնական բարձր պարունակություն: Նույն կազմն ունեն այն երկնաքարերը, որոնք հայտնաբերվել են Եգիպտոսում Կարմիր ծովի՝ երկու հազար կիլոմետր երկարությամբ առափնյա մասում:

news.am

08.06.16 Եգիպտոսում հայտնաբերել են Նեկտանեբ 1-ին ու Ռամզես 2-րդի հին տաճարները

Եգիպտոսի Էլ Մատարիա վայրում հնագիտական պեղումների ժամանակ Լեյպցիգի համալսարանի գիտնականները հայտնաբերել են հատվածներ, որոնք կարող են պատկանել Հին Եգիպտոսում Ք.ա 380-363 թթ. կառավարող Նեկտանեբ 1-ին փարավոնի տաճարին:

Նեկտանեբ 1-ինը, Սեբեննիտների տոհմից էր սերում, նա Հին Եգիպտոսի երեսուներորդ՝ վերջին դինաստիայի հիմնադիրն էր: Նրա օրոք Եգիպտոսը տնտեսական ու շինարարական վերելք է ապրում:

Հետազոտողները հայտնաբերել են մեծ քանակությամբ քարեր, ինչը նրանց թույլ է տվել ստեղծել հին կառույցի ենթադրյալ սխեման: Ստացված տվյալներով, տաճարը պետք է կրային ռելիեֆ ունենար ու սյուներ, որոնց միջև սև բազալտով երեսպատված տարածքներ էին: Տաճարի արևելյան դարպասները կառուցվել էին շագանակագույն ավազաքարից ու զարդարված գրություններով ու ծիսական տեսարանների պատկերներով:
Տաճարից հարավարևելք գտել են հին արհեստանոց, որը պատկանում է Ք.ա 4-րդ դարին, նաև Ռամզես 2-րդի տաճարի ենթադրյալ վայրը, ինչի մասին են վկայում հսկայական քանդակային կառույցների ու մեծ ռելիեֆային բլոկների հատվածները:

news.am

28.05.16 Գիտնականները տիեզերական ճառագայթման օգնությամբ առաջին անգամ սքանավորել են բուրգ

Գիտնականներն առաջին անգամ կարողացել են տիեզերական ճառագայթների օգնությամբ սքանավորել եգիպտական Դահշուրի բուրգը: Պատմական վկայությունների համաձայն՝ այն կառուցվել է մ.թ.ա. XXVI դարում Սնոֆրու փարավոնի հրամանով:
Ըստ Gazeta.ru-ի, տիեզերական ճառագայթների օգնությամբ ուսումնասիրությունն անհրաժեշտ է բուրգերում գաղտնի կառույցներ և տարածքներ հայտնաբերելու համար:

Գիտնականները սքանավորված բուրգում Սնոֆրու փարավոնի մասունքները չեն գտել, չնայած նախկինում ենթադրվում էր, որ փարավոնի վերջին հանգրվանը այդ բուրգն է: Դրանում նաև գաղտնի սենյակներ չեն հայտնաբերվել:

Գիտնականների նշումով, մոտ ապագայում նույն մեթոդով սքանավորելու են ևս երեք բուրգ:

news.am

18.05.16 Եգիպտոսում միասեռականության համար 11 տղամարդ ազատազրկման են դատապարտվել

Եգիպտոսում 11 տղամարդ միասեռականության համար դատապարտվել են ազատազրկման

Եգիպտոսում միասեռականության համար 11 տղամարդ դատապարտվել են ազատազրկման, տեղեկացնում է france24.com-ը:
Լրատվական կայքի փոխանցմամբ՝ Եգիպտոսում միասեռականությունը օրենքով արգելված է: Նրանցից երեքը կազատազրկվեն 12, երեքը՝ 9, մեկը՝ 6, չորսը՝ 3 տարով:

Եգիպտոսում միասեռականների հետապնդումներն ու դատապարտումները քննադատվել են իրավապաշտպան կազմակերպությունների կողմից:

09.05.16 Եգիպտոսցի պաշտոնյան մերձարևելյան ճգնաժամի համար մեղադրել է Թոմին ու Ջերիին

Եգիպտոսի պետական տեղեկատվական ծառայության ղեկավար Սալահ Աբդել Սադեքը Կահիրեի համալսարանում ունեցած ելույթի ժամանակ խոսել է Մերձավոր Արևելքում տիրող ճգնաժամի ու այնտեղ արմատավորվող ծայրահեղականության մասին` այդ ամենի համար մեղադրելով հայտնի մուլտհերոսներ Թոմին ու Ջերիին:
«Թոմի ու Ջերիի մասին մուլտֆիլմը բազմաթիվ պատճառներից մեկն է, որոնց հետևանքով արաբական աշխարհում տարածվում են բռնությունն ու արմատականությունը: Նույնիսկ եթե բռնությունը ներկայացվում է զվարճալի, կոմիկական տարբերակով, այն կրկին ագրեսիվության քարոզ է անում` խեղաթյուրելով երեխաների գիտակցությունը: Նմանատիպ մուլտֆիլմեր դիտող և դաժան բովանդակությամբ տեսախաղեր խաղացող երեխաների համար բռնությունը շատ սովորական երևույթ է դառնում»,- պաշտոնյայի խոսքերը մեջբերում է Al Arabiya-ն:

Աղբյուրը մանրամասնում է, որ այս հայտարարությունից հետո համացանցի բազմաթիվ օգտատերեր ծաղրել են Սադեքին` հիշեցնելով, որ Թոմ կատուն ու Ջերի մկնիկն ահաբեկիչներ չեն:

tert.am

01.05.16 Եգիպտացին դատի է տվել տիկնիկային ներկայացման հեղինակներին ներքնազգեստի պատճառով

Եգիպտացի իրավաբան Սամիր Սաբրին դատի է տվել «Ֆահիթա մորաքույր» ամենօրյա ժամանցային տիկնիկային շոուի հեղինակներին, քանի որ ներկայացումն իրեն վիրավորում է և սասանում երկրի բարոյական հիմքերը, փոխանցում է The Daily Mail-ը:

Սամիրին հատկապես զայրացրել է այն դրվագը, որտեղ Ֆահիթա տիկնիկը լսարանի առջև ներկայացել է ներքնազգեստով և սելֆի է արել, ավելին՝ նա մեջբերում է կատարել սկանդալային «Մոխրագույնի 50 երանգները» վեպից:

«Ֆահիթա մորաքույրը» խոսքի և ստեղծագործության ավելորդ ազատության վատ օրինակ է, դա ավելի շուտ բարոյական այլասերում է հիշեցնում: Այդ տիկնիկն իրեն չափից դուրս շատ բան է թույլ տալիս»,- ասել է Սաբրին:

Հաղորդվում է, որ դատական հայցը պետք է քննվի հունիսին:

news.am

24.04.16 Եգիպտոսում գտնվել է հնադարյան հսկայական դամբարանադաշտ

Եգիպտոսում Նեղոս գետի ափին հնագետները հայտնաբերել են հսկայական դամբարանադաշտ: Ժայռի վրա գտնվել են 42 գերեզմաններ և սրբավայր: Գտածոի տարիքը գնահատվում է 3400 տարի:
Ի սկզբանե ենթադրվում էր, որ գտածոն ընդամենը աշխատանքային փոքր ճամբար է, որտեղ ապրել են քարհանքի աշխատակիցները: Վերջին աշխատանքների արդյունքում տեղի և եվրոպացի մասնագետները հաղորդել են 18 կամ 19 դինաստիաների գերեզմանների հայտնաբերման մասին: Գերեզմաններից մեկը սրբավայր է եղել:

Գերեզմաններից շատերը թալանվել են հին դարերում: Պահպանվել են միայն ոսկորները և կերամիկական իրերը:

Մոտակա տարիներին հնագետները պլանավորում են պարզել Նեղոսի ափին հուղարկավորվածների անունները:

16.04.16 Սաուդյան Արաբիան Եգիպտոսին կապող կամուրջն անցնելու է Շարմ-էլ-Շեյխով

Եգիպտոսը և Սաուդյան Արաբիան մտադիր են կառուցել կամուրջ Կարմիր ծովի վրայով, որը կապելու է երկու պետությունները, հայտարարել է սաուդյան թագավոր Սալման բեն Աբդել Ազիզ Ալ Սաուդը:

Ինչպես հաղորդել է սաուդյան «Ալ-Արաբիա» հեռուստաալիքը, Կարմիր ծովի վրայով անցնող կամուրջը կապելու է Սաուդյան Արաբիայի հյուսիս-արևմտյան շրջանը եգիպտական Սինայ թերակղզու հետ: Մասնավորապես, ինչպես սպասվում է, այն անցնելու է Սինայի խոշորագույն կուրորտ Շարմ-էլ-Շեյխով:
Կամուրջի երկարությունը կազմելու է 7-10 կմ: Կամուրջով իրականացվելու է ինչպես ավտոմոբիլային, այնպես էլ երկաթուղային երթևեկություն:

Հեռուստաընկերության տեղեկացմամբ, Կարմիր ծովով անցնող կամուրջի շահագործմամբ զգալիորեն կրճատվելու է Պարսից ծոցից Սուեզյան ջրանցք, այնուհետև Եվրոպա ապրանքների տեղափոխման ժամանակը:

Սաուդյան կողմի հաշվարկներով, կամուրջով Եվրոպա տեղափոխվող ապրանքների ընդհանուր արժողությունը կազմելու է տարեկան 200 մլրդ դոլար:

05.04.16 Եգիպտոսում հայտնել են Նեֆերտիտիի դամբարանի հայտնաբերման մասին

Եգիպտական իշխանությունները տեղեկացրել են նոր փաստերի մասին, որոնք, հավանական է, ցույց են տալիս Նեֆերտիտիի դամբարանի տեղադիրքը: Չի բացառվում, որ այն գտնվում է Թութանհամոնի դամբարանի հետևում: Եթե ենթադրությունները հաստատվեն, ապա դա կդառնա եգիպտական հնագիտության հզորագույն բացահայտումը:

Թութանհամոնի դամբարանի սքանավորման հետազոտությունը ցույց է տվել դատարկ տարածության առկայություն դամբարանի երկու պատերի արանքում: Սքանավորման արդյունքները ցույց են տվել պատից այն կողմ տարբեր պատեր, տարբեր նյութեր, որոնք կարող են լինել մետաղական կամ օրգանական: Տվյալների վերլուծությունը կատարվել է Ճապոնիայում:

Շուտով գիտնականների միջազգային խումբը պատրաստվում է անցկացնել ևս մեկ սքանավորում: Այն պետք է հաստատի դատարկ տարածությունների առկայությունը:

Բրիտանացի եգիպտագետ Նիկոլաս Ռիվզը կարծում է, որ ի սկզբանե Թութանհամոնի դամբարանում թաղվել է Նեֆերտիտին:

28.03.16 Կանանց անհավատարմության մասին հաղորդագրությունը հանգեցրել է երեք տարվա ազատազրկման

Եգիպտական դատարանը Ֆեյսբուքում "կեղծ տեղեկատվության տարածման համար" բլոգեր Թայմուր-էլ-Սոբկիին երեք տարվա ազատազրկման և հարկադիր աշխատանքի է դատապարտել:

Այս ամենի պատճառը եղել է հրապարակված հաղորդագրությունը, համաձայն որի ամուսնացած կանանց 30%-ը պատրաստ է դավաճանել իր ամուսնուն:
Հայտարարությունը հասարակության մեջ առաջացրել է բուռն ռեակցիա և թոք-շոուներում և այլ բլոգերների հայտարարություններում դարձել է քննարկման առարկա: Գտնվել են և մարդիկ, ովքեր բողոքով դիմել են դատարան, քանզի բլոգերի խոսքերի մեջ կանանց հասցեին վիրավորանք են նկատել:

Ամբաստանյալի փաստաբան Համալ Էիդը վճիռը համարել է չափազանց դաժան: Նրա կարծիքով, Էլ-Սոբկիի խոսքերի հետ կարելի է համաձայնվել, կամ չհամաձայնվել, սակայն դրանով նա ոչ մի հանցանք չի գործել:
Ամբաստանյալը դեռևս ունի բողոքարկելու իրավունք:

20.03.16 Եգիպտական մաքսատանը վնասել են Բրայան Ադամսի կիթառը

Կանադացի երաժիշտ Բրայան Ադամսը բողոքել է սոցկայքերում, որ եգիպտական մաքսատանը արաբերեն գրվածքներով փչացրել են նրա ակուստիկ կիթառը:

Երաժիշտը ժամանել է Եգիպտոս, որպեսզի համերգ տա Գիզայի բուրգերի համալիրի մոտ: Ադամսի խոսքերով, խնդիրներն առաջացել են անմիջապես օդանավակայան ժամանելուց սկսած: Երաժիշտներին երկար ժամանակ չեն տրամադրել իրենց երաժշտական գործիքները, որից հետո վերադարձրել են արդեն գրառումներով հանդերձ:
Մաքսատանը հաստատել են, որ կիթառը ստուգման ժամանակ են վնասել, չնայած սովորաբար օգտագործում են կպչուն թղթեր:

Նման միջադեպ գրանցվում է ոչ առաջին անգամ: 2015թ.-ին Ադամսը արդեն բողոքել էր, որ Air Canada ինքնաթիռով թռչելուց հետո իր կիթառի վրա հայտնվել էր սև մարկերով թվագրում:

10.03.16 Հայաստանի դեսպանատունը ընդգրկվել է Կահիրեի "հեքիաթային վայրերի" ցանկում

Եգիպտական Identity Magazine հրատարակությունը կազմել է Կահիրեի 17 «հեքիաթային վայրերի» ցուցակը: Դրա մեջ նաև ներառվել է Հայաստանի դեսպանատունը:

"Թվում է, որ այս արտասովոր շինությունը "Քնած գեղեցկուհի" կամ "Հենզելն ու Գրետելը" հեքիաթներից է: Այն նաև կախարդական է, քանզի պերճաշուք է դիտվում արմավենիների ֆոնի վրա», - հրատարակությունը այսպես է նկարագրել հայկական դեսպանատունը:

Հայերի առաջին նշանակալի միգրացիան դեպի Եգիպտոս տեղի է ունեցել Ֆաթիմիդների դինաստիայի օրոք (909 -1171 թթ.): 19-րդ դարի վերջում Եգիպտոսում բնակվել է 10 000 հայ, սակայն 2015թ.-ից հետո նրանց թիվը հասել է 40 000-ի: Ժամանակի ընթացքում դեպի ԱՄՆ, Կանադա, Հայկական ԽՍՀ միգրացիայի արդյունքում հայերի թիվը նվազել է՝ հասնելով մոտ 6000-ի, ովքեր հիմնականում բնակվում են Կահիրեում և Ալեքսանդրիայում:

Հայաստանի և Եգիպտոսի միջև դիվանագիտական հարաբերությունները հաստատվել են 1992թ.-ի մարտին: Կահիրեում Հայաստանի դեսպանատունը բացվել է 1992թ.-ի սեպտեմբերին:

03.03.16 Եգիպտոսը նպատակադրվել է նոր հուշարձաններ ներառել ՅՈՒՆԵՍԿՕ-ի ցուցակում

Եգիպտոսը փորձում է հասնել Ալեքսանդրիան և Սինայի թերակղզու որոշ հուշարձաններ ՅՈՒՆԵՍԿՕ-ի համաշխարհային մշակութային ժառանգության ցուցակում ընդգրկվելուն:
Գերատեսչությունը ՅՈՒՆԵՍԿՕ ներկայացնելու համար զեկույց է պատրաստում Ալեքսանդրիայի հին եգիպտական հնագիտական օբյեկտների, մասնավորապես Պտղոմեոսի ժամանակաշրջանի, նաև Սինայի ռազմական ամրոցների վերաբերյալ:

Եգիպտոսից ՅՈՒՆԵՍԿՕ-ի ցուցակում ընդգրկված է 7 օբյեկտ, այդ թվում նաև` վաղ քրիստոնեական Աբու-Մենա հուշարձանը:

panorama.am Խմբագրումը կատարված է ԵԳԻՊՏ ՏՈՒՐԻ կողմից: Լրիվ կամ մասնակի արտատպելիս՝ www.egypttour.am կայքին հղվելը պարտադիր է:

24.02.16 Պատմության մեջ առաջին անգամ մառախուղը ծածկել է Ռամզես II-ի ժպիտը

Եգիպտոսի Աբու-Սիմբել տաճարային համալիրի վրա գոյացած մառախուղը պատմության մեջ առաջին անգամ զբոսաշրջիկներին խանգարել է տեսնել Ռամզես II փարավոնի "արևային ժպիտը": "Բոլորը սպասել են մոտ 20 րոպե, սակայն ապարդյուն: Նման բան դեռևս չէր պատահել", - նշել է Աբու-Սիմբել տաճարային համալիրի աշխատակիցը: Առավոտյան ժ. 6:25-ին փարավոնի դեմքի վրա էին ընկնելու արևի ճառագայթները, սակայն մառախուղի պատճառով դա տեղի չունեցավ:

Տարվա մեջ երկու անգամ՝ հոկտեմբերի 22-ին՝ փարավոնի ծննդյան օրը և փետրվարի 22-ին՝ նրա թագադրման օրը տաճարի ստորոտում առաջանում է զբոսաշրջիկների բազմահազարանոց հերթ: Շինությունն այնպես է կառուցված, որ հենց այս օրերին արևի ճառագայթներն ընկնում են տաճարի մութ միջանցքներ՝ լուսավորելով տաճարի ներսում գտնվող արձանի դեմքը: Հենց այս պահին են սպասում զբոսաշրջիկները, որպեսզի անմահացնեն տեսախցիկներով: Ականատեսները նշում են, որ արևի ճառագայթների ներքո երևում է, որ փարավոնը հեգնանքով ժպտում է:

Աբու-Սիմբել տաճարային համալիրը գտնվում է Նեղոսի արևմտյան ափին՝ Եգիպտոսի հարավում: Աբու-Սիմբելի գլխավոր հուշարձաններն են Ռամզես 2-րդ փարավոնի մեծ տաճարը և նրա կնոջ՝ Նեֆերտիտիի փոքր տաճարը: Այս ժայռափոր հուշարձանները ստեղծվել են մ.թ.ա. 13-րդ դարում:

13.02.16 Եգիպտոսի ոստիկանությունը ձերբակալել է Գիզայի բուրգերից քարեր վաճառողներին

Եգիպտոսի իրավապահ մարմինները ձերբակալել են տեղի երեք բնակչի, ովքեր զբաղվել են Գիզայի հին բուրգերից հանված քարերի վաճառքով: Այս մասին հաղորդում է News 24 գործակալությունը:

Ներքին գործերի նախարարությունը հայտարարել է ձերբակալության մասին այն բանից հետո, երբ տեղի լրատվական գործակալությունը հրապարակել է թաքնված տեսախցիկով նկարահանված տեսանյութ, որտեղ երևում է, որ զբոսակառքերի կառապանները 32 դոլարով վաճառում են երկու հինավուրց քար: Տեսանյութում նույնիսկ լսվում է, թե ինչպես է նրանցից մեկը գլուխ գովում, որ զբոսաշրջիկներին քարեր է վաճառել 500 եվրոյով:
Անօրինական առևտուրը տեղի է ունեցել Կահիրեի արվարձանում, որտեղ գտնվում է Քեոփսի բուրգը՝ Հին աշխարհի 7 հրաշալիքներից մինչ մեր օրերը պահպանված միակ հուշարձանը:

04.02.16 Եգիպտոսում ձերբակալել են իշխանությանը ծաղրող ծաղրանկարչին

Եգիպտոսի մայրաքաղաք Կահիրեում ձերբակալել են ծաղրանկարչի, ով իր աշխատանքներում ծաղրել է եգիպտական իշխանության քաղաքականությունը: Այս մասին նշել է երկրի Ներքին գործերի նախարարությունը, փոխանցում է Associated Press-ը:
Այսպես, հաղորդվում է, որ նկարիչ Իսլամ Գովիշին ձերբակալել են «գործող ռեժիմի համար վիրավորական պատկերներ հրապարակելու համար»: Նրան ձերբակալել են Egypt News Network տեղի լրատվական պորտալի գլխավոր գրասենյակում, և հենց գրասենյակում անցկացվել է խուզարկություն:

Հիշեցնենք, որ սա Եգիպտոսի իշխանությանը քննադատելու համար պատժի կիրառման առաջին դեպքը չէ: Ավելի վաղ երկրի քաղաքացիներից մեկը երեք տարով դատապարտվել է այն բանի համար, որ նախագահի լուսանկարի վրա նրան նկարել է Միկի-Մաուսի ականջներ:

26.01.16 Եգիպտական թանգարանի աշխատակիցները դատարանի առջև են կանգնելու Թութանհամոնի մորուքի պատճառով

Կահիրեի թանգարանի 8 աշխատակիցների դատի են տվել՝ Թութանհամոն փարավոնի մորուքը սոսնձելու պատճառով, մեղադրելով անփութության ու մասնագիտական ստանդարտների խախտման մեջ:
Մեկ տարի առաջ պարզ է դարձել, որ Թութանհամոնի հետմահու դիմակի վրա հայտնաբերվել են կիսաթափանցիկ սոսնձանյութի հետքեր: Ըստ մի վարկածի, դիմակի վրայից մորուքը պատահական պոկել են, իսկ մյուս վարկածով, մորուքն ինքն իրեն է պոկվել` հնությունից: Քննիչները հավաստիացնում են, որ թանգարանի աշխատակիցները հապշտապ փորձել են ամեն ինչ թաքցնել՝ մորուքը մեծ քանակությամբ սոսնձի միջոցով ամրացնելով դիմակին:

Թութանհամոնի հետմահու դիմակի տարիքը հաշվվում է մոտ 3000 տարի:

18.01.16 Եգիպտոսը զբոսաշրջիկների անվտանգության համար ներդնելու է 32 մլն դոլար

Եգիպտոսի Զբոսաշրջության նախարար Հիշամ Զաազուան հայտարարել է, որ Եգիպտոսի իշխանությունը լրացուցիչ քայլեր է ձեռնարկելու զբոսաշրջիկների անվտանգությունն ապահովելու համար և բյուջեից արդեն տրամադրել է 250 մլն եգիպտական ֆունթ (32 մլն դոլար):

Նախարարությունը տարածել է հայտարարություն, որում ասվում է, որ ավելացվելու է զբոսաշրջության անվտանգության ոլորտում աշխատող աշխատակազմի, ոստիկանական շների քանակը, Շարմ էլ-Շեյխ և Հուրգադա գլխավոր հանգստավայրերում ներդրվելու է հյուրանոցների ցամաքային և ծովային տարածքների անվտանգության լիակատար վերահսկողության համակարգ, ներդրվելու են նորագույն սկաներներ և մետաղի դետեկտորներ:

25.12.15 Թութանհամոնի ստնտուի առեղծվածային դամբարանը բաց է զբոսաշրջիկների համար

Զբոսաշրջիկներ գրավելու նպատակով Եգիպտոսն առաջին անգամ այցելությունների համար բացել է Թութանհամոնի ստնտու Մայայի դամբարանը: Նոր տեսարժան վայրը Կահիրեից մի քանի կիլոմետր հեռավորության վրա գտնվող Սակկարա գերեզմանոցում է:

Գիտնականները բացել են դամբարանը մոտ 20 տարի առաջ և մինչև օրս զբաղվել են դրա ուսումնասիրմամբ՝ ներս չթողնելով զբոսաշրջիկներին:
Մասնագետները ենթադրում են, որ դամբարանում կարող է թաքնված լինել այն հարցի պատասխանը, թե ինչու է մահացել 19-ամյա Թութանհամոնը: Գիտնականները գտնում են, որ պատասխանը կարող է գծված լինել դամբարանի պատերին:

Արաբական պետության իշխանությունները հաղորդել են, որ տեսարժան վայրը բացվել է զբոսաշրջիկներ գրավելու համար:

16.12.15 Կահիրեի օդանավակայանում բացվել է պատմության թանգարան

Կահիրեի միջազգային օդանավակայանում օրերս բացվել է թանգարան: Այն հնարավորություն է տալիս ուղևորներին ծանոթանալ երկրի պատմությանը և մշակույթին:
Ցուցադրությունը գտնվում է 3-րդ տերմինալում:

Lonely Planet-ի հաղորդմամբ` նրանում ներառված են պատմական տարբեր դարաշրջաններին վերաբերող արվեստի 38 գործեր: Օդանավակայանում ներկայացված են ցուցանմուշներ Կահիրեի եգիպտական, Կոպտական և Իսլամական արվեստի թանգարաններից:

Սկզբնապես թանգարանի բացումը նախատեսված էր հոկտեմբերի 31-ին, սակայն այդ օրը Սինայի թերակղզու վրա տեղի ունեցավ ռուսական ինքնաթիռի աղետը, ինչի պատճառով էլ այն հետաձգվեց:

07.12.15 Crystal Lagoons Corp-ը Շարմ-էլ-Շեյխում կառուցելու է հսկայական ծովալճակ

Crystal Lagoons Corp. ընկերությունը պատրաստվում է գերազանցել սեփական ռեկորդը և Շարմ-էլ-Շեյխում կառուցել աշխարհի ամենամեծ ծովալճակը:

Ինչպես հաղորդում է eturbonews-ը, Crystal Lagoons ընկերությունը արդեն ներկայացրել է անապատում ծովալճակի ստեղծման նախագիծը: Լագունան զբաղեցնելու է 12.5 հա տարածք, իսկ նախագծի ողջ տարածքը կազմելու է 750 հա, որի վրա կառուցվելու են ջրի կայաններ, հյուրանոցներ, զբոսանավերի նավահանգիստ, թանգարաններ, խանութներ և գոլֆի ակումբ:

Շինարարության սկսվելու և ավարտվելու ամսաթվերը չեն նշվում:

01.12.15 Եգիպտագետները Թութանհամոնի դիմակի իրական տիրուհի են ճանաչել Նեֆերտիտիին

Բրիտանացի եգիպտագետ Նիկոլաս Ռիվզը (Nicholas Reeves) հայտարարել է, որ Թութանհամոն փարավոնի հայտնի ոսկյա դիմակը իրականում ի սկզբանե պատրաստվել է նրա խորթ մոր՝ Նեֆերտիտի թագուհու համար:

Ինչպես հաղորդում է The Independent-ը, Ռիվզը նման ենթադրության է հանգել լրացուցիչ թեսթերից հետո, որոնք ցույց են տվել, որ Թութանհամոնի անունով հիերոգլիֆները ավելացվել են այլ գրառումների վրայից: Ենթադրվում է, որ ի սկզբանե դիմակի վրա գրված է եղել Նեֆերտիտիի ամբողջական տիտղոսը. «Արևի աստվածի կենդանի մարմնավորում, Էհնաթոնի սիրուհի, արեգակնային սկավառակի գեղեցիկներից գեղեցիկը»:
Դիմակի վրա դիմագծերն, իհարկե, հարմարեցվել են Թութանհամոնին:

Ենթադրվում է, որ դիմակը պատրաստել են թագուհու համար, սակայն հետո այն պահ են տվել և մի փոքր ձևափոխելուց հետո օգտագործել են Թութանհամոնի թաղման ժամանակ:

23.11.15 Եգիպտոսը բուրգերը կսկանավորի տիեզերական ճառագայթների միջոցով

Եգիպտական իշխանությունները պատրաստվում են հայտարարել Կահիրեում գտնվող պատմական բուրգերի, այդ թվում Գիզայի մեծագույն բուրգերի նոր գլոբալ հետազոտության մեկնարկի մասին:
Ավելի վաղ ղեկավարությունը հայտարարել էր, որ բուրգերի նոր հետազոտությունը իրենից ներկայացնելու է տիեզերական ճառագայթների օգնությամբ դամբարանների սկանավորում: Մեթոդը ներառում է բուրգերի վրա գերզգայուն սենսորների տեղադրում, որոնք գրանցելու են տիեզերական ճառագայթների ազդեցությամբ մթնոլորտի վերին շերտերում առաջացող մասնիկների հոսքերը: Այս կերպ գիտնականները պլանավորում են լուսաթափանցել բուրգերի հաստ պատերը և ստանալ նրանց կառուցվածքի ճշգրիտ քարտեզը:

Սկանավորվելու են ոչ միայն Գիզայի Մեծ բուրգերը, այլև Դահշուրայի կոտրված բուրգը, Ջոսերի բուրգը Սակկարայում և մի շարք այլ դամբարաններ:

Բուրգերը մինչև օրս գաղտնիքներ են թաքցնում, որոնց թվում էլ նրանց կառուցման առեղծվածը:

15.11.15 Հայոց ցեղասպանության մասին նոր ֆիլմը ցուցադրվեց Եգիպտոսում

Եգիպտոսի տարածաշրջանային հանձնաժողովի, Կահիրեի Հայոց առաջնորդարանի և Եգիպտոսում ՀՀ դեսպանության աջակցությամբ նկարահանվել է Հայոց ցեղասպանության մասին արաբերենով պատմող "Ո՞վ սպանեց հայերին" փաստա–վավերագրական ֆիլմը, որի պրեմիերան օրերս տեղի ունեցավ Կահիրեի Միսր էլ–Գեդիդայի գրադարանում:

Մեկ ժամ 10 րոպե տևողությամբ ֆիլմի հեղինակների գլխավոր նպատակն է Օսմանյան կայսրությունում Հայոց ցեղասպանության պատմությունը, մարդկության նկատմամբ ոճրագործության մասին իրականությունը արաբախոս հանդիսատեսին լիարժեք կերպով ներկայացնելը։

Ֆիլմի հեղինակներն են Մարիամ Զաքին և Մոհամեդ Հանաֆին` եգիպտացի անվանի կինոգործիչներ։
10 ամիս տևած նկարահանումները կատարվել են Հայաստանում, Եգիպտոսում, Լիբանանում։ Ֆիլմում լայնորեն օգտագործվել են հարցազրույցներ, արխիվային փաստաթղթեր, տեսաժապավեններ, լուսանկարներ, ականատեսների և վերապրածների վկայություններ։

aadmag.am Խմբագրումը կատարված է ԵԳԻՊՏ ՏՈՒՐԻ կողմից: Լրիվ կամ մասնակի արտատպելիս՝ www.egypttour.am կայքին հղվելը պարտադիր է:

07.11.15 Անհամեստ հագնված աղջիկներին կարգելեն քվեարկել

Կահիրեում անցկացվել է Եգիպտոսի ներքին գործերի նախկին փոխնախարար գեներալ–մայոր Ռիֆատ Կամսանի մամլո ասուլիսը, ով պատասխանատու է խորհրդարանական ընտրությունների անվտանգության համար: Նա խորհուրդ է տվել կին ընտրողներին կրել համեստ հագուստ: «Պետք է հարգել մեր օրենքները և ավանդույթները: Նրանց, ովքեր հագնում են շորտեր, ուղղակիորեն կարգելեն մասնակցել ընտրություններին 11000 տեղամասերից և ոչ մեկում»,- մեջբերում է նրա խոսքերը Middle East Eye կայքը:

Խորհրդարանական ընտրությունների առաջին փուլը տեղի ունեցավ հոկտեմբերի 17-18-ին արտասահմանից քվեարկողների համար և հոկտեմբերի 18-19-ին՝ արդեն Եգիպտոսում: Երկրորդ փուլը տեղի կունենա համապատասխանաբար նոյեմբերի 21-22-ին և 22-23-ին: Այս օրերը հայտարարված են որպես աշխատանքային:

29.10.15 Եգիպտացի փեսացուն նետել է կնոջը պատշգամբից

Եգիպտացին նետել է կնոջը պատշգամբից հարսանիքի հաջորդ օրը, երբ պարզել է, որ կինը կույս չէ:

Ողբերգությունը տեղի է ունեցել Կահիրեում: Շինության բնակիչները տեղեկացրել են, որ տեսել են հարսնացուին չորրորդ հարկի պատշգամբից ներքև ընկնելիս:
Ոստիկանությունը ձերբակալել է փեսացուին: Նա խոստովանել է իր հարսնացուի սպանության փաստը:

21.10.15 Եգիպտացի դերասանուհին դատարան է կանչվել պոռնոգրաֆիկ ֆիլմեր դիտելու կոչերի համար

Եգիպտացի դերասանուհի Էնտիսսարը դատարանի առջև կանգնելու է այն բանից հետո, երբ al-Qahira Waalnas հեռուստաալիքի եթերում հայտարարել է, որ երիտասարդները պետք է դիտեն պոռնոգրաֆիկ ֆիլմեր, եթե այս կամ այն պատճառով ամուսնացած չեն: Այս մասին գրում է Independent-ը: Եգիպտոսի գլխավոր դատախազը մեղադրել է դերասանուհուն այլասերվածություն տարածելու համար: Եգիպտուհին դատարան է կանչվել նոյեմբերի 10-ին:

2015թ.-ի հոկտեմբերի 10-ին al-Qahira Waalnas հեռուստաալիքի եթերում 44-ամյա Էնտիսսարը միտք է արտահայտել, որ չամուսնացած տղամարդկանց անհրաժեշտ է այցելել պոռնոկայքեր, որպեսզի գիտենան, թե ինչ և ինչպես է պետք անել հարսանիքից հետո: Նրա կարծիքով, հավատքի արգելքների պատճառով երիտասարդ եգիպտացիները սեռական հարաբերության փորձ չունեն, այդ պատճառով պետք է դիտեն պոռնոգրաֆիկ ֆիլմեր:

Մահմեդական եկեղեցական Հալիդ Ալ-Ջինդին մեկնաբանելով Էնտիսսարի ասածը՝ հայտարարել է, որ նման կերպ նա անբարոյականության կոչեր է անում: Ի պատասխան դերասանուհին ասել է, որ չի վախենում քննադատություններից, քանզի ոչ մի վատ բան չի ասել:

Արաբական երկրի օրենքի համաձայն՝ դերասանուհուն սպասվում է մինչև 1 տարի ազատազրկում:

2009թ-ից Եգիպտոսում արգելված է համացանցում պոռնոգրաֆիկ ֆիլմեր դիտելը:

13.10.15 Հայտնի եգիպտագետը Եգիպտոսում հանգիստը համարում է անվտանգ

«Եգիպտոսյան ուղևորությունները լիովին անվտանգ են զբոսաշրջիկների համար», - լրագրողների հետ հանդիպման ժամանակ հայտարարել է Հին Եգիպտոսի հնէաբան և պատմաբան Զահի Հավասսը: «Ուզում եմ նշել, որ Եգիպտոսն անվտանգ է: Դա բացարձակ ճշմարտություն է: Հեղափոխությունից հետո եգիպտացիները հասկացել են, թե որքան կարևոր է զբոսաշրջությունն իրենց համար»,- նշել է Հավասսը: «Մենք ամբողջությամբ կախված ենք զբոսաշրջությունից և դրանից ստացվող գումարից: Ես միշտ բացատրում եմ մարդկանց, որ եթե ինչ-որ տեղ Եգիպտոսում ռումբ է պայթեցվել, ապա անվտանգության քայլերը ավելի են ուժեղացվել»,- հայտարարել է հնէաբանը՝ ընդգծելով, որ իր առաքելությունը իր երկրի անվտանգության մասին մարդկանց հայտնելն է: «Եգիպտոս կարելի է այցելել տաս անգամ, սակայն ամեն անգամն էլ հայտնաբերել մի նոր բան: Սա յուրահատուկ երկիր է, և մենք ցանկանում ենք, որ զբոսաշրջիկները ժամանեն այստեղ», - ավելացրել է նա:

Զահի Հավասսը հայտնի եգիպտաբան է, բազմաթիվ գրքերի և գիտական աշխատությունների հեղինակ: Նա զբաղվում է Հին Եգիպտոսի պատմության և մշակույթի մասսայականացմամբ հեռուստատեսային փաստագրական սերիալների միջոցով:

05.10.15 Եգիպտոսում քննում են հյուրանոցի գործը, որը կոչ է արել կատարել նվիրատվություններ

Եգիպտոսի Տուրիզմի նախարարությունը Մարսա Ալամ կուրորտային շրջանում հետաքննություն է անցկացնում հյուրանոցներից մեկի մենեջմենթի վերաբերյալ, որի հյուրերին առաջարկվել է նվիրաբերել իրենց իրերը տեղի բնակչության կարիքների համար: Հյուրանոցի աշխատողները հյուրերին բաժանել են բրոշյուրներ՝ սեփական հագուստը, կոշիկները և այլ իրեր շրջանի աղքատ բնակիչներին նվիրաբերելու խնդրանքով: "Բարեկեցիկ դարձնենք Մարսա Ալամ շրջանի աղքատ բնակիչների կյանքը: Հատուկ դրա համար մենք տեղադրել ենք նվիրաբերությունների արկղ ռեստորանի մոտ և ողջունում ենք հագուստ, կոշիկ կամ հյուրանոցից դուրս գալուց հետո պետքը չունեցող բոլոր իրերը տրամադրողներին", - նշվել է բրոշյուրի մեջ եվրոպական մի քանի լեզուներով:

Վարույթը սկսվել է տուրիստական ոստիկանություն փաստաբաններից մեկի կողմից հայտ ներկայացվելուց հետո: Նրա կարծիքով, հյուրանոցի նախաձեռնությունը ոչ այլ ինչ է, քան շորթում և նվաստացնում է բոլոր եգիպտացիներին:

Եգիպտոսի Տուրիզմի նախարարությունը հյուրանոցին ստիպել է գտնել նոր գլխավոր մենեջեր և բոլոր հյուրանոցներին զգուշացրել է խուսափել նման միջադեպերից, որոնք երկրի հեղինակությանը հարված կհասցնեն ու կգցեն եգիպտական տուրիզմի վարկանիշը:

26.09.15 Թութանհամոնի դամբարանը փակվելու է

Զբոսաշրջիկների շրջանում մեծ հետաքրքրություն վայելող Թութանհամոնի դամբարանը, որը գտնվում է Լուքսորի մոտ, հոկտեմբերի 1-ից փակվելու է վերանորոգման նպատակով: Դեռևս հայտնի չէ, թե որքան ժամանակ է տևելու դամբարանի ռեկոնստրուկցիան:

Հին հուշարձանների պահպանման պատասխանատու, նախարար Մամդուհ ալ-Դամատին նշել է, որ վերանորոգման ընթացքում փարավոնի մումիան տեղափոխվելու է դամբարանի կողմնային կառույցներից մեկը:

2015թ.-ի հունվարին հայտարարվել էր, որ Կահիրեի եգիպտական թանգարանի աշխատակիցները պատահաբար պոկել են Թութանհամոնի մորուքը դիմակից: Վնասվածքը թաքցնելու նպատակով նրանք ամրացրել էին մորուքը էպոքսիդե սոսնձով: Ավելի ուշ գերմանացի ռեստավրատոր Քրիստիան Էկմանը նշել էր, որ վնասման լրջությունը չափազանցված էր:

17.09.15 Rixos Seagate Sharm - "վեցաստղանի" հյուրանոց Եգիպտոսում

Rixos Hotels ցանցը ընդլայնում է իր հորիզոնները Եգիպտոսում: Հոկտեմբերին Շարմ-էլ-Շեյխում բացվելու է պրեմիում կարգի երկրորդ հյուրանոցը: Հյուրանոցին տրվել է 5 աստղի կարգ, սակայն թոփ-մենեջերը գտնում է, որ Rixos Seagate Sharm-ին պետք է տրվի 6 աստղ: Այս հյուրանոցը եգիպտական տուրինդուստրիայում բացելու է մի նոր էջ:

Ծառայությունները լինելու են Ultra All Inclusive համակարգով: Հյուրանոցն առաջարկում է 654 համարներ, որոնք համաշխարհային վերջին ստանդարտներով են ստեղծված:
Առաջարկում է մի շարք բարձրակարգ ծառայություններ՝ դռնապանի ծառայություն, ուղեբեռի պահպանման տեսանկարահանում, տեղեկատվական աջակցություն, լողափ երեխաների համար, ջրային այգու առկայություն, ինչպես նաև էքսկուրսիաներ:
Rixos Seagate Sharm-ն առաջարկում է նաև էքստրեմալ հանգիստ, օրինակ դայվինգ:
Հյուրանոցը նաև գործնական հանդիպումների կենտրոն է: ՈՒնի տեխնիկապես հագեցած կոնֆերանսների սրահ:

Հյուրանոցը գտնվում է Կարմիր ծովի ափին:

09.09.15 Շարմ-էլ-Շեյխն ու Հուրգադան ժամանակավորապես դադարեցնում են թռիչքներ ընդունելը

Վերջին օրերին Սիրիայի, Հորդանանի, Իսրայելի և Լիբանանի տարածքներում բարձրացած ավազե փոթորիկը երեկ հասել է Կիպրոս, իսկ այսօր՝ նաև Եգիպտոս:

Վատ տեսանելիության պատճառով Եգիպտոսում օդանավակայաններն աշխատում են խափանումներով: Այսպես, Շարմ-էլ-Շեյխը չի ընդունում և չի ճանապարհում ինքնաթիռներ: Օրվա առաջին կեսին թռիչքները տեղափոխվել են Հուրգադա, սակայն ավելի ուշ Հուրգադան ևս դադարեցրել է թռիչքներ ընդունել:

Ինչ վերաբերում է Եգիպտոսի հանգստավայրերին, ապա ընդհանուր առմամբ լողափային գծում ամեն ինչ հանգիստ է, ջրային էքսկուրսիաները չեն դադարեցվել: Սակայն անապատային էքսկուրսիաները ժամանակավորապես անհասանելի են:

04.09.15 Ուժեղ տուրբուլենտության արդյունքում EgyptAir-ի 12 ուղևորներ հոսպիտալացվել են

Ինչպես հաղորդում է The Daily Mail-ը՝ EgyptAir ավիաընկերության Նյու-Յորք-Կահիրե չվերթի Boeing 777 ինքնաթիռը, որը փոխադրում էր 268 ուղևորների, թռիչքից մի քանի ժամ անց սկսել է թափահարվել: Օդաչուն որոշել է շարունակել թռիչքը և բարեհաջող վայրէջք է կատարել Կահիրեում: Եգիպտական մայրաքաղաքի օդանավակայան ժամանելիս 10 ուղևոր և անձնակազմի 2 անդամ մակերեսային վնասվածքներով տեղափոխվել են հիվանդանոց:

Միջադեպից հետո ինքաթիռը անցել է ստուգում, սակայն մանրամասները չեն հաղորդվում:

31.08.15 Եգիպտոսում հայտնաբերել են առաջին փարավոններից մեկի դամբարանը

Եգիպտոսի հյուսիսում գտնվող Մինուֆիա նահանգում՝ Քուվեյսինում հայտնաբերվել է Հին եգիպտական III-րդ դինաստիայի Խաբա փարավոնի 4,5 հազ. տարվա դամբարանը:
Այս վայրում Հին եգիպտական դարաշրջանի նման հուշարձան գիտնականներն առաջին անգամ են հայտնաբերում: Ավանդաբար այդ վայրերում արտեֆակտներ են հայտնաբերվել, որոնք պատկանում են ավելի վաղ հռոմեական ժամանակաշրջանին:

Խաբան համարվում է III-րդ դինաստիայի փարավոն (մ.թ.ա. 27-րդ դար), սակայն, ինչպես գիտնականներն են նշում, դա հաստատված չէ թագավորական և ոչ մի ցուցակով, չնայած որ նրա անունը հիշատակվում է մի քանի աղբյուրներում: Նրա գահակալման մասին գրեթե ոչինչ հայտնի չէ, շատ տվյալներ էլ վիճահարույց բնույթ են կրում: Ըստ մի շարք հետազոտողների՝ Խաբան Խուն փարավոնի անուններից մեկն է, թեև կան պատմաբաններ, որոնք հակված են այն կարծիքին, որ Խաբան դինաստիայի երրորդ թագավորն է, որը եղել է Խունի նախորդը: Գոյություն ունեն Խաբա թագավորի գահակալման ժամանակաշրջանի 11 հուշարձաններ, որոնց վրա պահպանվել է փարավոնի անունը:

Խաբան համարվում է Կլոր Բուրգի ստեղծողը, որը տեղակայված է Սակկարայի և Գիզայի միջև: Այն մի անավարտ շինություն է՝ Հին թագավորության սկզբնական շրջանի ոճով կառուցված: Խաբայի բուրգի սկզբնական բարձրությունը կարող էր հասնել մինչև 45 մ, իսկ այժմ 20 մետրից մի փոքր բարձր է:

23.08.15 Ամերիկացի հնէաբանը հայտնել է Նեֆերտիտի թագուհու դամբարանի գտնվելու հնարավոր վայրը

ԱՄՆ-ի Արիզոնայի համալսարանի հնէաբան Նիկոլաս Ռիվզը ենթադրում է, որ մ.թ.ա. 14-րդ դարում բնակված Հին եգիպտական թագուհի Նեֆերտիտիի դամբարանը գտնվում է փարավոն Թութանհամոնի դամբարանի գաղտնարանում: Ռիվզը այս տեսակետը առաջադրել է դամբարանի եռաչափ պատկերների հիման վրա, որոնք նախորդ տարի արվել են իսպանական Factum Arte ընկերության կողմից:

Ինչպես ենթադրում է հնեաբանը, դեպի Նեֆերտիտիի գաղտնի գերեզման են տանում Թութանհամոնի դամբարանի պատերից մեկում թաքնված խորշերը: Բացի դրանից, Ռիվզը նշում է, որ Թութանհամոնի դամբարանի չափերն ավելի փոքր են մյուս փարավոնների դամբարաններից, քանզի ի սկզբանե դամբարանը նախատեսված է եղել Նեֆերտիտիի համար:
Նշենք, որ Նեֆերտիտիի դամբարանը մինչ օրս գտնված չէ:

Թութանհամոնի դամբարանն առանձնանում է այն փաստով, որ վերջինս լավ պահպանվել է և ժամանակին թալանի պատճառով չի կործանվել:

19.08.15 Եգիպտոսում շոգից մեկ շաբաթվա ընթացքում 87 մարդ է մահացել

Միջազգային ԶԼՄ-ները, հղում անելով այդ երկրի առողջապահության նախարարությանը, հաղորդում են, որ Եգիպտոսում շոգից մեկ շաբաթվա ընթացքում 87 մարդ է մահացել: Նաև ոչ պակաս, քան 1,5 հազար մարդ տեղափոխվել է հիվանդանոց:
Եգիպտոսում այս անսովոր տաք եղանակը պահպանվում է արդեն մեկ շաբաթ:

Վերջին անգամ Եգիպտոսում բարձր խոնավությամբ և 50 աստիճանը գերազանցող նման եղանակ գրանցվել է 1978 թվականին:

16.08.15 Եգիպտոսը փոխում է աշխարհի քարտեզը. բացվել է Սուեզի ջրանցքի նոր 72-կիլոմետրանոց հունը

Սուեզի ջրանցքի 72 կմ երկարությամբ նոր ուղին պաշտոնապես հանձնվել է շահագործման: Հանդիսավոր արարողության ժամանակ Եգիպտոսի նախագահ Աբդել Ֆատտախ աս-Սիսին ստորագրել է նավարկության մեկնարկի մասին հրամանագիրը:

Սպասվում է, որ ջրանցքի երկրորդ ուղու աշխատանքների մեկնարկը ներդրողների համար կբացի հսկայական հնարավորություններ, քանի որ համալիրն իր մեջ կներառի լոգիստիկ կենտրոն, արդյունաբերական գոտիներ և 200 կմ երկարությամբ երկաթուղային ցանց:

Սուեզի ջրանցքի նոր ուղու շահագործումից հետո նավերի ջրանցքով անցնելու ժամանակահատվածը կկրճատվի՝ 18-ից դառնալով 10 ժամ, ինչը թույլ կտա մեծացնել ջրանցքով անցնող նավերի քանակը՝ օրական քառասունյոթից մինչև իննսունութ:
Ըստ միջազգային փորձագետների՝ կառույցը շահեկան է ոչ միայն Եգիպտոսի, այլ նաև ամբողջ աշխարհի առևտրի համար, քանի որ այժմ ջրանցքով անցնում է համաշխարհային կոնտեյներային բեռնափոխադրումների մոտ 25%-ը:

Ջրանցքի նոր ուղու շինարարական աշխատանքները ավարտին են հասցվել տասներկու ամսվա ընթացքում՝ չնայած նրան, որ ի սկզբանե նախատեսված է եղել երեք տարի:

08.08.15 Եգիպտական կուրորտները կարող են զրկվել աբորիգեններից

Եգիպտոսի կուրորտային շրջանի որոշ ռեստորանների, հյուրանոցների և լողափերի սեփականատերեր սկսել են արգելել հիջաբներով կանանց մուտքը իրենց տարածք: Այս մասին հաղորդում է Al Arabia-ն:

Եգիպտացի կանայք վերջին շրջանում սոցիալական կայքերում ավելի հաճախ են դժգոհում իրենց իրավունքների ոտնահարումից՝ կապված այն բանի հետ, որ ամառային սեզոնին նրանց չեն թույլատրում գլխաշորերով մտնել տուրիստական գոտիների հասարակական վայրեր:
Մահմեդական կանանց գլխաշորերով մուտքը հասարակական վայրեր արգելվել է այնպիսի քաղաքներում, ինչպիսիք են Հուրգադան և Շարմ-էլ-Շեյխը: Ռեստորանների, հյուրանոցների և լողափերի սեփականատերերը գնացել են այդ քայլին՝ պատճառաբանելով, որ արտասահմանյան զբոսաշրջիկները վախենում են սև գլխաշորերից:

Եգիպտական կառավարությունը սպառնում է փակել այն հաստատությունները, որտեղ կգործի նման խտրականություն:

30.07.15 Էլեկտրոնային վիզաները Եգիպտոսում շրջանառության մեջ կմտնեն 2016թ.-ին

Անհատական զբոսաշրջիկների կողմից եգիպտական սահմանը հատելու նոր կարգը սահմանող Էլեկտրոնային վիզաների ձևակերպման համակարգի մեկնարկը կտրվի ոչ վաղ, քան 8 ամսից: Այս մասին «ՌԻԱ» լրատվականին է հայտնել Եգիպտոսի տուրիզմի նախարար Հալիդ Ռամին:

Ի սկզբանե պլանավորված էր, որ մայիսի 15-ից Եգիպտոսի իշխանությունները, անվտանգության նկատառումները հաշվի առնելով, անհատական զբոսաշրջիկների համար կմտցնեն վիզայի նախնական ստացման գործընթացը: Սակայն հետագայում քննարկումներից հետո եգիպտական իշխանությունները որոշում ընդունեցին ներմուծել էլեկտրոնային վիզաների ձևակերպման նոր ռեժիմ: «Դեռևս հիմնավորապես ուսումնասիրվում են նոր մեխանիզմի մանրամասները: Ես գտնում եմ, որ էլեկտրոնային վիզայի ստեղծման, տեստավորման ողջ գործընթացը կտևի մոտ 8-10 ամիս»,- նշել է նախարարը:

22.07.15 Շուտով կգործի Հուրգադայից դեպի Շարմ էլ Շեյխ գնացող լաստանավը

Եգիպտոսում Հուրգադայի և Շարմ էլ Շեյխի միջև լաստանավային ծառայությունը կգործի հաջորդ ամսվանից:

Երկու ծովափնյա քաղաքների միջև կանոնավոր ծովային կապը կնպաստի զբոսաշրջության զարգացմանը և նոր աշխատատեղերի ստեղծմանը ինչպես մեկ, այնպես էլ մյուս հանգստավայրում:

Հայտնի է, որ և Շարմ էլ Շեյխը (գտնվում է Սինայ թերակղզու հարավային հատվածում) և Հուրգադան (գտնվում է Կարմիր ծովի ափին, անմիջապես Սուեզի ջրանցքի հարևանությամբ, Շարմ էլ Շեյխին դեմ առ դեմ) զբոսաշրջային շուկայում հսկայական պահանջարկ ունեն:

Լաստանավն ունի առավելություններ. առաջինը՝ որ այն ավելի էժան է, քան ինքնաթիռը: Երկրորդը՝ ավելի արագ է, քան ուղևորատար մեքենան: Հայտնի է, որ վարորդները ստիպված երկար հեռավորություններ են անցնում՝ տեղափոխվելով մի հանգստավայրից մյուսը:

15.07.15 Հուրգադան նպատակ է դրել հայտնվել Գինեսի ռեկորդների գրքում

Հուրգադայում Եգիպտոսից և այլ երկրներից մոտ 400 դայվերներ են հավաքվել՝ ստորջրյա լողի նոր ռեկորդ սահմանելու:

Խումբը, եգիպտացի դայվեր Ահմեդ Գաբրի գլխավորությամբ, նպատակ ունի լայն հասարակության ուշադրությունը հրավիրել Կարմիր ծովի՝ աղբի կույտով ծածկված ջրոլորտի անմխիթար վիճակին, որը խոչընդոտում է կորալյան խութերի բնականոն կենսագործունեությանը:

Ահմեդ Գաբրի անունը արդեն երկու անգամ հիշատակվել է Գինեսի ռեկորդների գրքում. առաջին անգամ նա մրցանակ է ստացել ամենամեծ խորությամբ սուզվելու համար, երկրորդ անգամ՝ ծովում հնարավոր առավելագույն (332.35 մ) խորությամբ դայվինգի համար:

Գաբրի ներկայիս ծրագրերում դայվինգի համաշխարհային ռեկորդի համար մրցակցությունն է:

10.07.15 Մահացավ Օմար Շարիֆը

Երկարատև հիվանդությունից հետո այսօր, 83 տարեկան հասակում, կյանքից հեռացավ համաշխարհային կինեմատոգրաֆի աստղ, եգիպտացի կինոդերասան Օմար Շարիֆը: Դերասանը տառապում էր Ալցհեյմերի հիվանդությամբ:

Համաշխարհային կինեմատոգրաֆում Օմար Շարիֆը բազմաթիվ դերեր է կերտել: Նրա ամենահայտնի աշխատանքներն են համարվում "Լոուրենս Արաբացի" և "Դոկտոր Ժիվագո" ֆիլմերում խաղացած դերերը:
Նկարահանվել է հայազգի կինոռեժիսոր Անրի Վերնոյի "Մայրիկ" ֆիլմում, որից հետո Թուրքիան արգելել է նրա մուտքը երկիր:

Եղել է "Ոսկե գլոբուս" կինոմրցանակի կրկնակի դափնեկիր և "Օսկար" մրցանակի թեկնածու:

05.07.15 Եգիպտոսում հայտնաբերել են եզակի հնագույն դամբարաններ

Եգիպտոսի հարավում գտնվող Ասուան քաղաքի շրջանում տեղի հնագետները հայտնաբերել են սարկոֆագներով և մումիաներով վեց դամբարաններ, որոնք պատկանում են Հին Եգիպտոսի պատմության ավելի ուշ ժամանակահատվածին:
Հայտնաբերված դամբարաններից յուրաքանչյուրը բաղկացած է երեք-չորս ներքին սրահներից, ուր կարելի է հասնել քարե աստիճաններով: Սարկոֆագներում հայտնաբերվել են աստվածների հախճապակյա և փայտե արձանիկներ:

Հայտնաբերված իրերը մեր թվարկությունից առաջ 664-525 թվականների են: Ցուցանմուշները պատկանում են փարավոնների 26-րդ դինաստիայի կառավարման ժամանակաշրջանին և, ըստ հնագետների, կօգնեն գիտնականներին պարզել շինարարության տեխնոլոգիաները:

27.06.15 Գիտնականները պարզել են, թե Հին Եգիպտոսում ինչպես էին պայքարում վերապրուկի (похмелье) դեմ

Վերծանելով Հին եգիպտական պապիրուսները՝ հնագետներն այնտեղ գտել են աշխարհում վերապրուկի դեմ պայքարի առաջին բաղադրատոմսերից մեկը:
Այսպիսով, եգիպտացիների կարծիքով, "ուրախ խնջույքներից հետո նման իրավիճակում հայտնվածները պետք է Ալեքսանդրյան դափնու տերևներից պատրաստված վզնոց կրեն", - գրում է "Սինխուա" գործակալությունը:

Ինչպես հայտնում են, բաղադրատոմսը մոտ 2 հազար տարեկան է, սակայն գիտական ապացույցներ դեռ չկան, որ դափնին կարող է ազդեցություն ունենալ վերապրուկի վրա:

21.06.15 Սուեզի ջրանցքի կրկնօրինակի կառուցման աշխատանքները Եգիպտոսը ավարտին կհասցնի մինչև օգոստոս

Եգիպտոսում նոր ջրատարի կառուցումը, որը պետք է ավելացնի Սուեզի ջրանցքի հզորությունը, նախատեսվում է ավարտին հասցնել այս տարվա օգոստոսին:
Շինարարությունը սկսվել է 2014 թվականի օգոստոսին, և ռեկորդային ժամանակահատվածում հաջողվել է իրականացնել նախագիծը: Ի սկզբանէ նախատեսվում էր աշխատանքներն ավարտին հասցնել երեք տարվա ընթացքում, սակայն Եգիպտոսի նախագահ Աբդել Ֆատտախ աս-Սիսիի հրամանով շինարարությունը պետք է ավարտվի 12 ամսվա ընթացքում:

Նախագծի ֆինանսավորման մեջ իրենց մասնակցությունն են ունեցել Եգիպտոսի բնակիչները. այդ նպատակով իշխանությունները պարտատոմսեր են թողարկել տարեկան 12% եկամուտով, որի շնորհիվ էլ հավաքվել է ավելի քան 8 մլրդ դոլար:

Նոր ջրանցքի երկարությունը կազմելու է 72 կիլոմետր, իսկ բացթողման հնարավորությունը՝ օրում 46 նավ: "Նոր Սուեզը" անցնելու է 145 տարի առաջ կառուցված նավարկելի ուղուն զուգահեռ:

Ըստ բրիտանական BBC հեռուստառադիոկորպորացիայի՝ "Նոր Սուեզը", կանխատեսումների համաձայն, Սուեզի ջրանցքի շահագործման եկամուտը տարեկան կավելացնի 2,5 անգամ. մինչև 13,5 մլրդ դոլար:

Սուեզի ջրանցքը Հնդկական օվկիանոսն ու Միջերկրական ծովը կապող ամենակարճ ջրային ուղին է:

14.06.15 Հին եգիպտացիները քաղցկեղով չեն հիվանդացել

Հնադարյան գրավոր վկայություններում չկա ոչ մի ակնարկ "քաղցկեղ" հիվանդության մասին:

Հետազոտվել են բազմաթիվ մումիաներ` չարորակ ուռուցքների հետքեր հայտնաբերելու նպատակով: Միայն մեկ եգիպտական մումիայի մոտ հայտնաբերվել է հաստ աղիքի քաղցկեղ:
Չարորակ ուռուցքների հյուսվածքները ավելի լավ են պահպանվում, քան առողջ հյուսվածքները: Հին Եգիպտոսում վիրաբուժությունը ցածր մակարդակի վրա էր գտնվում, ուստի ուռուցքները հեռացնել չէին կարող:
Արդյունքում, գիտնականները հանգել են այն եզրակացության, որ քաղցկեղը ժամանակակից հիվանդություն է, որն առաջանում է աղտոտված միջավայրի ազդեցության և ոչ ճիշտ սնվելու հետևանքով:

Հնում մարդիկ ընդհանրապես չգիտեին այդ հիվանդության մասին: Իսկ եթե հիվանդությունն այնուամենայնիվ ի հայտ էր գալիս, ապա դա լինում էր շատ հազվադեպ, քանի որ բնության մեջ հավանաբար չկան ուռուցքածին գործոններ:

09.06.15 Եգիպտոսի բուրգերի շրջակայքում սպանվել են տուրիստական ոստիկանության երկու աշխատակից

Եգիպտոսի բուրգերի շրջակայքում սպանվել են տուրիստական ոստիկանության երկու աշխատակիցներ

Եգիպտոսի տուրիստական ոստիկանության երկու աշխատակիցներ սպանվել են երկրի ամենագլխավոր տեսարժան վայրի՝ Կահիրեի արևելքում գտնվող Գիզայի բուրգերի շրջակայքում: Այդ մասին հայտնել է Reuters-ը՝ հղում անելով անվտանգության ծառայությունների աղբյուրներին:
Նրանց հաղորդմամբ՝ ողբերգությունը տեղի է ունեցել հսկիչ-անցակետից մոտ 30 մետր հեռավորության վրա, որի միջով զբոսաշրջիկները հասնում են բուրգերի մոտ: Մոտոցիկլետով անհայտ տղամարդը կրակել է իրավապահների վրա: Դեռ ոչ մի խմբավորում իր վրա պատասխանատվություն չի վերցրել կատարվածի համար:

Վերջին ժամանակներում իսլամիստները բազմաթիվ հարձակումներ են իրագործել ոստիկանների և գործող իշխանության այլ ներկայացուցիչների վրա: Շատ հաճախ այդ հարձակումները տեղի են ունենում հսկիչ-անցակետերում և ոստիկանական բաժանմունքներում, երբեմն իրավապահների վրա հարձակվում են ճանապարհներին:

2013 թվականին Եգիպտոսի զինված ուժերի ղեկավար, գեներալ Աբդել Ֆատտախ ալ-Սիսիի կողմից նախագահ Մոհամմեդ Մուրսիի տապալումը կազմակերպելուց հետո ոստիկանների վրա իսլամիստների հարձակումներն ավելի հաճախակի դարձան:

03.06.15 Եգիպտոսում 20 դպրոցական փորձել են բռնաբարել ուսուցչուհուն

Եգիպտոսում դպրոցականները փորձել են բռնաբարել իրենց ուսուցչուհուն, ով խաբեության համար նրանց վռնդել էր ավարտական քննություններից:
Դեռահասները սպասել են ուսուցչուհուն դպրոցի մոտ և հենց այնտեղ էլ հարձակվել կնոջ վրա: Ուսուցչուհուն փրկել են ժամանակին միջամտած այլ ուսուցիչներն ու դպրոցականները:

Եգիպտոսի կրթության նախարարությունը որոշում է ընդունել դադարեցնել աշխատանքները այդ դպրոցական հաստատությունում մինչև այն ժամանակ, քանի դեռ հարձակվողների նկատմամբ չեն ձեռնարկվել համապատասխան միջոցներ:

Աղմկահարույց դեպքը տեղի է ունեցել Կահիրեի դպրոցներից մեկում:

29.05.15 Եգիպտական մումիաները հայտնվել են համաշխարհային սկանդալի կենտրոնում

Մանչեսթերի համալսարանի և թանգարանի բրիտանացի գիտնականներն ուսումնասիրել են կենդանիների շուրջ 800 մումիաներ և եկել ցնցող եզրակացության. նրանց 30%-ը կեղծ են:

Մանրազնին ուսումնասիրության արդյունքում պարզվել է, որ դրանք իրենց ձևով կենդանիներ հիշեցնող, դատարկ փաթեթավորված քաթաններ են: Այս մասին հայտնում է "Բի-Բի-Սի-ի ռուսական ծառայությունը":
Փորձագետները պնդում են, որ նույնիսկ գտել են այդ երևույթի պատճառները. Հին Եգիպտոսում կենդանիների մումիաների պահանջարկը, որոնց թվում բացի կատուներից և թռչուններից կային նաև կոկորդիլոսներ, զգալիորեն գերազանցում էր առաջարկին: Ստեղծված իրավիճակից դուրս գալու համար հինեգիպտական ձեռներեց խրտվիլակագործները գնում էին կեղծարարության:

Դրա հետ մեկտեղ նշվում է, որ մնացած մումիաներն էլ իդեալական չեն. նրանցից մեկ երրորդը պարունակում են կենդանու մարմնի հատվածներ:

23.05.15 Եգիպտոսում կվերականգնեն աշխարհի յոթերորդ հրաշալիքը

Եգիպտական իշխանությունները նախատեսում են վերականգնել Ալեքսանդրյան փարոսը՝ հնադարի մեծագույն կառույցներից մեկը, որն ավիրվել էր 14-րդ դարում, այդ մասին հայտնում է "Լայֆնյուսը":
Տեղի ԶԼՄ-ները գրում են, որ այդ հարցով զբաղվում է Եգիպտական հնությունների կոմիտեն, որն Ալեքսանդրիայի նահանգապետին պատրաստել և ներկայացրել է աշխարհի յոթերորդ հրաշալիքի վերականգնման նախագիծը:
Նախագիծն ընդունվել է: Նախատեսվում է, որ այն կկառուցվի Փարոս կղզում՝ նախկինում գտնված վայրին մոտ:

Տեղեկություն
Ալեքսանդրյան փարոսը կառուցվել է մեր թվարկությունից առաջ 3-րդ դարում, Ալեքսանդրիայից ոչ հեռու, և հանդիսանում է աշխարհի յոթերորդ հրաշալիքներից: Մեր թվարկության 8-րդ դարում նրան ուժգին վնաս է հասցրել երկրաշարժը, իսկ 14-րդ դարում անկում է ապրել և վերջնականապես ավիրվել է ստորգետնյա ցնցումներից:

16.05.15 Պոռնոդերասանուհին ցույց է տվել իր մարմնի բարեմասնությունները բուրգերի ֆոնի վրա

Եգիպտոսի իշխանությունները քննում են "18+" ժանրի ամերիկյան դերասանուհու գործունեությունը բուրգերի շրջակայքում: Նշվում է, որ կինը, որը պոռնոգրաֆիկ էլիտայի շրջանում հայտնի է Կարմեն դե Լուզ կեղծանունով, իր Twitter-ի էջում բոլորի ուշադրությանն է ներկայացրել բուրգերի ֆոնի վրա արված ինտիմ բնույթի իր լուսանկարները:
Սակայն Կահիրեին զայրացրել է ոչ միայն ամերիկուհու հենց անբարո պահվածքի փաստը, այլ նաև այն, որ նրա ֆոնի վրա չեն երևում ոչ ավտոբուսներ, ոչ էլ մարդիկ, ինչից էլ կարելի է եզրակացնել, որ նա գտնվել է «տուրիստական Մեքքայի» տարածքում էքսկուրսիայի համար արգելված ժամանակահատվածում:

Սկզբում շշուկներ էին պտտվում, որ կինը, բուրգերի և սֆինքսի մոտ լուսանկարից բացի նկարահանել է նաև ինտիմ բնույթի տեսանյութ, սակայն նա հերքել է այդ տեղեկատվությունը՝ վստահեցնելով, որ իր ջանքերի արդյունքը միայն լուսանկարներն են: "Ես Եգիպտոսում պոռնոգրաֆիկ բնույթի տեսանյութ չեմ նկարահանել՝ հարգելով այնտեղ բնակվող ժողովրդի սրբությունը", - գրել է նա:

Հարկ է նշել, որ սա վերջին երկու ամսվա ընթացքում արդեն երկրորդ սկանդալն է՝ կապված պոռնոարտադրանքի և բուրգերի հետ. մարտ ամսին զբոսաշրջիկներ էին ձերբակալվել, որոնք նկարահանում էին իրենց սեռական ակտը այս հինավուրց վայրում:

11.05.15 Եգիպտական անապատի կենտրոնում գտնվող արկտիկական բնապատկերը

Եգիպտոսի որոշ շրջաններ, որտեղ ամռանը միջին ջերմաստիճանը պահպանվում է +35ºС, կարող են ձնապատ Արկտիկայի տեսք ունենալ:
Լուսանկարիչ Մոսաաբ Ելշամին ճանապարհորդում է Եգիպտոսով և յուրօրինակ լուսանկարներ անում: Օրինակ, Կահիրեից 180 կմ դեպի հարավ գտնվող Մինյա նահանգում Ելշամիի լուսանկարներին արկտիկական կոլորիտ է հաղորդում ձնափայլ կրաքարը՝ հարյուրավոր մետրերով հաստ շերտով ծածկելով շուրջբոլորը:
Շուրջ 45 000 մարդ, այդ թվում և երեխաներ, ջանասիրաբար աշխատում են տեղի կրաքարի 1500 հանքերում: Օրը 7-13 դոլար աշխատելու համար նրանք իրենց կյանքն ու առողջությունը մահացու վտանգի են ենթարկում: Վտանգը կրաքարերի մասնիկներից է գալիս: Շնչուղիների պահպանման համար քարհանքերի բոլոր աշխատողները պետք է դիմակներ կրեն:

05.05.15 Եգիպտական բուրգերին կից գտնվող երկու դամբարանները վերականգնումից հետո բացվել են

Վերականգնողական աշխատանքներից հետո Եգիպտոսի հնությունների գործերով նախարարությունը ներկայացրել է երկու նոր դամբարաններ Կահիրեում գտնվող Գիզայի բուրգերի մոտ. հուշարձանները բաց են հասարակության համար:
Դամբարանները պատկանում են Հին թագավորության ժամանակաշրջանում Քեոփս փարավոնի գլխավոր քուրմ Էմրիին և նրա ավագ որդուն՝ Նեֆեր-բա-Պտախին, որը թագավորական ֆավորիտներից էր:
«Հնագույն թագավորության ժամանակաշրջանի գերեզմանները անհատական հուղարկավորության օրինակ են համարվում: Այցելուները կկարողանան տեսնել, թե ինչպիսի դավանանք էր ընդունված այն ժամանակ, ինչպես նաև գնահատել այն ժամանակաշրջանի ճարտարապետա-գեղարվեստական ոճը», - ասել է բացմանը ներկա Մամդուխ ադ-Դամատին՝ Եգիպտոսի հնությունների գործերով նախարարը:

Հուշարձանների վերականգնողական աշխատանքները սկսվել էին դեռ 2010 թվականին, սակայն հաջորդող հեղափոխության և բազմաթիվ ցնցումների պատճառով հետաձգվել էին և վերսկսվել վեց ամիս առաջ:

Դամբարանները 1925 թվականին հայտնաբերել է ամերիկացի հնագետ Ջորջ Ռեյսները:

29.04.15 Եգիպտոսում խմելու ջրից ավելի քան 500 մարդ է թունավորվել

Եգիպտական Շարքիա նահանգում մոտ 500 մարդ թունավորվել է խմելու ջրից: Հայտնում են, որ հիվանդանոցներում գտնվում է ավելի քան 70 մարդ, որոնցից երեքը` շատ ծանր վիճակում: Բժիշկները անհրաժեշտ օգնություն ցուցաբերելուց հետո մյուս տուժածներին թույլ են տվել տուն գնալ:
Ըստ նախնական տեղեկությունների, նրանք բոլորն էլ թունավորվել են փողոցային բաքերի ջրից: Պատճառը կարող էր վերջին միջադեպը լինել, երբ Նեղոս գետում կամրջի հենարանի հետ բախման հետևանքով ֆոսֆատով բեռնված նավակը խորտակվեց: Քիմիկատները լցվել էին գետը և կարող էին անցնել ջրամատակարարման համակարգ: Սակայն առայժմ իշխանությունները հերքում են այդ պատճառը:

23.04.15 Հայազգի պարուհուն Եգիպտոսում դատապարտել են դրոշը պղծելու համար

Կահիրեի դատարանը վեց ամսվա ազատազրկման է դատապարտել Մերձավոր Արևելքում հայտնի պորտապարուհի, Ռուսաստանի Դաշնության քաղաքացի Ծովինար Գրիգորյանին: Աղջիկը պետք է վճարի նաև տուգանք: Ինչպես հայտնում են տեղի ԶԼՄ-ները, պարուհուն մեղադրել են եգիպտական դրոշի հանդեպ անհարգալից վերաբերմունքի համար:

Մերձավոր Արևելքում Սաֆինազ կեղծանունով հայտնի Գրիգորյանը տարածաշրջանում ամենահայտնի պորտապարուհիներից է:

Տեղի արդարադատության հետ խնդիրները հայ կնոջ մոտ սկսվել են այն բանից հետո, երբ նա անցած ամռանը Եգիպտոսի հանգստավայրերից մեկում արևելյան պար է կատարել այնպիսի հագուստով, որի գույները հիշեցրել են եգիպտական դրոշը: ԶԼՄ-ների ձեռքն ընկած խնջույքի տեսագրությունը բուռն արձագանք է ստացել եգիպտական հասարակության կողմից: Իսկ տեղի դատախազությունում պետական խորհրդանշի օգտագործումը նման ազատ ոճի պարում համարել են ոչ պատշաճ և պարուհուն մեղադրել պետական դրոշի հանդեպ անհարգալից վերաբերմունքի համար:

18.04.15 Շարմ Էլ Շեյխի հյուրանոցները նուդիստական լողափեր են բացում գեյ-զբոսաշրջիկների համար

Լրացուցիչ զբոսաշրջիկներ ներգրավելու համար Եգիպտոսի իշխանությունները որոշել են աննախադեպ միջոցառումներ ձեռնարկել, որոնք բացարձակապես բնորոշ չեն երկրին: Շարմ Էլ Շեյխի հենց կենտրոնում, Նաամա Բեյի բոլոր լողափերի մոտ 30%-ը պետք է փոխակերպվեն նուդիստների համար հատուկ լողափերի: Ինչպես հայտնում է «El Arabeia» թերթը, նորարարության հետ կապված՝ պաշտոնատար անձինք ակնկալում են զբոսաշրջիկների նկատելի աճ Գերմանիայից, Ֆրանսիայից, Իտալիայից և մասամբ Ռուսաստանից:

Շարմ Էլ Շեյխի կենտրոնում սկսվել է հսկա նուդիստական լողափի շինարարությունը, որը մասամբ կմիավորի միանգամից մի քանի կենտրոնական հյուրանոցների լողափերը: Մինչդեռ միայն նուդիստական լողափով պաշտոնատար անձինք չեն սահմանափակվի. նոր տարածքի վրա կկառուցվի մի ամբողջ նուդիստական համալիր՝ իր բարերով, ռեստորաններով և գիշերային ակումբներով, այդ թվում և սեռական փոքրամասնությունների համար: Հավանաբար, ըստ տեղական աղբյուրների, համալիրի տարածքում կօրինականացվի մարիխուանան ու հաշիշը, որոնք առայժմ միայն գաղտնի են վաճառվում Շարմ Էլ Շեյխում:
Նախագծվում է, որ համալիրը բարձր պարսպով կանջատվի ընդհանուր լողափից, ուր տեղի բնակչության մուտքը խստիվ կարգելվի:

Նաամա-Բեյ թաղամասում տեղակայված հյուրանոցների մի մասը արդեն ապրիլի 1-ից իր հյուրերի և աշխատակիցների համար ներմուծել է նուդիստական դրես-կոդ:

Այնուամենայնիվ, մի շարք ավելի պահպանողական տրամադրված տեղացիներ արդեն հասցրել են բողոքի ակցիա անցկացնել Շարմ Էլ Շեյխի օդանավակայան տանող ճանապարհին՝ փորձելով արգելափակել Գերմանիայից ժամանած գեյ-զբոսաշրջիկների ավտոբուսը, որը ոստիկանությունը ցրել է:

12.04.15 Եգիպտոսին առաջարկել են օրինականացնել հաշիշը

Եգիպտական ծխախոտագործները երկրի իշխանություններին առաջարկել են օրինականացնել հաշիշը հեղափոխության տարիների ընթացքում լուրջ հարված ստացած տնտեսությունը փրկելու համար:

«Ալ Մասրի ալ-Յաում» թերթի տվյալներով. “Բուրգերի երկրում հաշիշի շրջանառությունը կազմում է մոտ 42 միլիարդ եգիպտական ֆունտ (մոտ 5,5 միլիարդ դոլար), ինչը կազմում է ազգային եկամտի 2,5%-ը: Դրա հետ մեկտեղ իշխանությունները այն վաճառողների հետ պայքարում ծախսում են ավելի քան 1 միլիարդ եգիպտական ֆունտ (ավելի քան 131 միլիոն դոլար): Հաննիբասի օրինական օգտագործումը կունենա և այլ դրական պահեր. կհանգեցնի թմրադեղի պահանջարկի նվազմանը:
Հաշիշի օրինական վաճառքը պետական գանձարանին կարող է բերել տարեկան ավելի քան կես միլիարդ դոլար:

Եգիպտոսում հաննիբաս է ծխում համարյա թե բնակչության կեսը, այսինքն՝ մոտ 40-45 միլիոն մարդ՝ չհաշված երկիր մուտք գործող օտարերկրացիների”, հայտնում է թերթը:

10.04.15 Տուրօպերատորները պետք է զբոսաշրջիկներին զգուշացնեն Եգիպտոսում շնաձկների մասին

Ռուսաստանի տուրարդյունաբերության միությունը (ՌՏՄ), ողբերգական միջադեպի հետ կապված, հիշեցնում է տուրօպերատորներին, որ Եգիպտոս մեկնող ռուսներին ափամերձ ջրերում շնաձկներ հանդիպելու ռիսկի հավանականության մասին անհրաժեշտ է գրավոր զգուշացնել: Նմանատիպ տեղեկատվության բացակայությունը կարող է հիմք հանդիսանալ տուրիստական ընկերությանը պատասխանատվության ենթարկելու համար, գրում է RATA-News-ը:
«Ռուսաստանի Դաշնությունում զոսաշրջային գործունեության հիմքերի մասին» Դաշնային օրենքի 14-րդ հոդվածի համաձայն, տուրօպերատորների հաճախորդները դատական կարգով իրավունք ունեն չեղյալ համարել զբոսաշրջային ապրանքի իրականացման պայմանագիրը կամ փոփոխել այն, եթե ի հայտ գան այնպիսի հանգամանքներ, որոնք վկայում են երկրում ժամանակավոր կացություն հաստատած զբոսաշրջիկների կյանքի և առողջության անվտանգության համար սպառնալիքների առաջացման մասին:

Գերմանիայից ժամանած զբոսաշրջիկի վրա շնաձկան հարձակումը տեղի է ունեցել Էլ-Քուսեյր քաղաքի ափերին: Վերջին ժամանակներում այս փոքրիկ քաղաքը ճանաչում է ձեռք բերել ամբողջ աշխարհի դայվերների շնորհիվ:
Հինգ տարվա մեջ սա առաջին դեպքն է, որ Եգիպտոսի ափամերձ ջրերում գիշատիչը հարձակվի մարդու վրա: 2010 թվականին Շարմ Էլ Շեյխում տեղի է ունեցել լողի սիրահարների վրա շնաձկների միանգամից մի քանի հարձակում, ինչի հետ կապված այդ քաղաքի լողափերը երկու շաբաթով փակվել էին: Այն ժամանակ կենսաբանները եզրակացրեցին, որ ափին այդքան մոտ շնաձկների հայտնվելու պատճառը Կարմիր ծովում նրանց հիմնական սնունդը հանդիսացող թյունոս տեսակի ձկների քանակի նվազումն է, ինչպես նաև դայվերների՝ ստորջրյա կենդանական աշխարհով հիանալու համար ձկներին կերակրելու սովորությունը: Նաև պարզվել է, որ Շարմ Էլ Շեյխի ափերից ոչ այդքան հեռու գտնվող ոչխարներով բեռնված նավերից հիվանդ կենդանիներին ծովն էին գցել, որոնք էլ կարող էին «կանչել» ծովային գիշատիչներին:

Շնաձկների հարձակումից առաջացած իրարանցումը (2010 թվականին 3 ռուս զբոսաշրջիկներ են տուժել և Գերմանիայի մի քաղաքացի վախճանվել է) Հարավային Սինայի իշխանություններին ստիպեց միջոցառումներ ձեռնարկել. Շարմ Էլ Շեյխի լողափերը համալրվեցին աշտարակներով, որտեղ ցերեկվա ժամերի ընթացքում հերթապահում են փրկարարները, ծովում հերթապահում են ափի անվտանգությունը ապահովող մոտորանավակները, իսկ զբոսանավերից արգելված է ջուրը նետել սննդի թափոնները: Ամբողջովին արգելված է ձկների կերակրումն ու ձկնորսությունը: Շարմ Էլ Շեյխի մոտակայքով անցնող նավերին սկսել է ուղեկցել պահակազորը՝ հետևելով որ ոչինչ չնետեն ծովը: Նաև նախատեսվում էր ծովում ամուր ցանցեր տեղադրել, որոնք պետք է խանգարեին գիշատիչներին ափ մոտենալ, սակայն դա չիրագործվեց: Միայն մի քանի հյուրանոցներ ցանկապատեցին իրենց լողափերը:

Եգիպտոս

Եգիպտոս հանգիստ / Մեր մասին

Եգիպտոս

Եգիպտոս տուրեր, հյուրանոցներ, վիզա . Հանգիստ արտասահմանում

Շարմ էլ Շեյխ . Հուրգադա . Էքսկուրսիաներ Sharm el Sheikh . Hurghada

Եգիպտոս Շարմ Էլ Շեյխ Հուրգադա

Եգիպտոս Egiptos Egyptos

Եգիպտոս տուրիզմ

Եգիպտոսի Նորություններ

Եգիպտոսի վիզա, Եգիպտոս տուրեր, հյուրանոցներ

Եգիպտոս տուրեր / Օգտակար խորհուրդներ